«NN» sabrała fakty ź bijahrafii staršyni pradprymalnickaj arhanizacyi «Pierśpiektyva» Anatola Šumčanki.
Rodam ź Minska, vučyŭsia ŭ MHEU
Anatolu Šumčanku 40 hadoŭ, jon naradziŭsia i vyras u Minsku. Baćka byŭ rabočym, maci pracavała na zavodzie «Intehrał». Jon skončyŭ kamiercyjny Mižnarodny humanitarna-ekanamičny ŭniviersitet. Pierad hetym navučaŭsia ŭ PTV-222. Kaža, što konkurs na toj čas składaŭ 14 čałaviek na miesca. Šumčanka nie karystajecca biełaruskaj movaj, kaža, što ŭ škole nie navučyli.
U śfieru IP trapiŭ maładym, u 22 hady byŭ pradaŭcom na rynku «Dynama». Praź niejki čas sam staŭ pradprymalnikam, mieŭ niekalki pałatak na rynku «Ždanovičy», na siońnia biznesu nie maje, skancentravany na hramadskaj rabocie. Jašče da «Pierśpiektyvy» jon uznačalvaŭ «Abjadnanuju radu pradprymalnikaŭ». 12 sakavika 2003 hoda było zarehistravanaja hramadskaje abjadnańnie «Pierśpiektyva». Cikava, što ŭ toj samy dzień u Minsku prajšoŭ marš «Za lepšaje žyćcio».
Chacieŭ stać prezidentam
U 2004 hodzie Anatol Šumčanka ŭ intervju haziecie «Naša Niva» nie chavaŭ svaich prezidenckich ambicyj: «Mnoju ruchaje imknieńnie ŭładkavać ułasnaje žyćcio, žyćcio majoj siamji, pastajannuju płyń finansaŭ, mieć svabodu vykazvańniaŭ i ŭčynkaŭ. Kali b u mianie ŭsio heta było, to ja b nie zajmaŭsia hramadskaj dziejnaściu. Pakul hetaha nie budzie, ja budu pracavać na źmieny. Kali dla hetaha treba budzie stać prezidentam, ja stanu. Ja ž baču, kolki razumnych ludziej navokał. Treba, kab im dali šaniec realizavać svaje zdolnaści», — kazaŭ tady Šumčanka.
Tajamničaja kryminalnaja sprava
U 2005 hodzie pačałosia novaje supraćstajańnie ŭłady i pradprymalnikaŭ. Ad 1 studzienia 2005 hoda IP musili ŭpłočvać padatak na dadanuju vartaść, jaki składaŭ 18% ad cany tavaru. 1 sakavika niekalki tysiač pradprymalnikaŭ vyjšli na Kastryčnickuju płošču z patrabavańniem admieny padatku. U vyniku Anatol Šumčanka byŭ aryštavany na 10 sutak, adnak pa skančeńni terminu na volu nie vyjšaŭ. Užo ŭ izalatary na jaho była zaviedzienaja kryminalnaja sprava pa artykule 339 KK «Chulihanstva». Maŭlaŭ, Šumčanka źbiŭ sukamiernika.
Urešcie 31 sakavika jon niečakana dla ŭsich vyjšaŭ na volu, bo prakuratura paličyła, što hetaja sprava maje «małuju značnaść». Što stajała za hetym vyzvaleńniem, było zrazumieła nie ŭsim.
Pierastaŭ supracoŭničać z apazicyjaj
U pieršyja hady svajoj hramadskaj dziejnaści Šumčanka aktyŭna kamunikavaŭ z apazicyjnymi palitykami. Naprykład, jon razam ź Mikałajem Statkievič byŭ inicyjataram stvareńnia abjadnanaj sacyjał-demakratyčnaj partyi, jakaja tak i nie paŭstała. A «Pierśpiektyva» ŭvachodziła ŭ kaalicyju partyj i arhanizacyj, jakija stavili na metu ŭstupleńnie Biełarusi ŭ Jeŭrasajuz.
Ź ciaham času Šumčanka adyšoŭ ad palityčnych patrabavańniaŭ, skancentravaŭsia na prablemach pradprymalnikaŭ. Naprykład, jon admoviŭsia brać udzieł u Kanhresie demsił pa vybarach adzinaha kandydata ad apazicyi ŭ 2005 hodzie.
«Hanicie ad siabie roznych Šumčankaŭ»
Apošnija bujnyja vuličnyja akcyi pradprymalnikaŭ prajšli ŭ studzieni 2008 hoda. Tady pradprymalniki i hramadskija aktyvisty navat pierakryvali praśpiekt, a taksama patrabavali vyklikać kiraŭnictva krainy na pieramovy. Anatol Šumčanka jakraz i nakiravaŭsia na pieramovy ŭ Administracyju prezidenta, dzie sustrakaŭsia z zahadčycaj hałoŭnaha ekanamičnaha ŭpraŭleńnia Administracyi prezidenta Inaj Miadźviedzievaj (siońniašniaj kiraŭničkaj Biełstata). Paśla viartańnia Šumčanki ź pieramovaŭ jaho zatrymali i asudzili na 10 sutak.
Toj pratest skončyŭsia «Spravaj čatyrnaccaci», kali na łavie padsudnych akazalisia moładzievyja aktyvisty.
U 2014 hodzie na adnoj z narad pa raźvićci pradprymalnictva Alaksandr Łukašenka niečakana ŭzhadaŭ kiraŭnika «Pierśpiektyvy» Anatola Šumčanku. Jon skazaŭ: «Hanicie ad siabie roznych tam Šumčanka, nie toje jašče kahości, kab jany navat blizka kala vas nie stajali».
Anatol Šumčanka žanaty, razam z žonkaj Volhaj hadujuć dźviuch dačok.
