Ilhotny taryf na vadu i kanalizacyju vyras amal u 4 razy. Na haz i elektryčnaść admianili «lhotu na PDV» — dla spažyŭcoŭ košt vyras na 20%. Narešcie, padaražała i techničnaje absłuhoŭvańnie. Składvajecca ŭražańnie, što ŭłady ŭzialisia za kamunałku, kab pavialičyć dachody biudžetaŭ.
Biełaruski sacyjalizm
Kolki składzie ŭ Biełarusi kamunałka pa novych taryfach? Dla prykładu voźmiem kvateru płoščaj 50 m2, u jakoj pražyvaje siamja z troch čałaviek.
Bazavy taryf techničnaha absłuhoŭvańnia zastaŭsia raniejšym, pa im daviadziecca zapłacić 49 700 rubloŭ, na kapitalny ramont adličycca jašče 41 900 rubloŭ.
Ciapier da techničnaha absłuhoŭvańnia dadaducca novyja radki. Płata za lift budzie kaštavać siamji kala 50 tysiač, a pryborka — kala 20 tysiač.
U kožnym domie zimoj hrejuć pa-svojmu. Kali batarei piakuć, to i płacić daviadziecca bolš. U našaj śniežańskaj žyroŭcy za aciapleńnie vystavili 65 tysiač, a za padahreŭ vady 48 tysiač. Chałodnaja vada i kanalizacyja pa novym taryfie składuć kala 30 tysiač.
U kvatery jość elektraplita, i siamja ŭkładvajecca ŭ 150 kVt/h. Značycca, pa novym taryfie elektryčnaść budzie kaštavać kala 150 tysiač. Ciapier daviadziecca asobna dapłačvać za śviatło ŭ padjeździe — kala 10 tysiač.
Vyvaz i pierapracoŭka śmiećcia paciahnuli jašče na 25 tysiač.
Ahułam kvartpłata za dvuchpakajoŭku ŭzimku skłała 495 tysiač rubloŭ — mienš za $25 u ekvivalencie. Heta kala 6% ad siaredniaha zarobku minčuka «čystymi».
Zrazumieła, što dziaržaŭnyja datacyi, jakimi zakryvajecca častka kvartpłaty, biarucca ź biudžetu. Jaki, u svaju čarhu, napaŭniajecca padatkami biełarusaŭ.
Litva — na rynkavych umovach
Krainy Bałtyi słaviacca svaimi drakonaŭskimi taryfami na kamunalnyja pasłuhi — takaja cana enierhietyčnaj niezaležnaści ad Rasii. Techabsłuhoŭvańnie ŭ Vilni ŭ čatyry razy daražejšaje, čym u Minsku, vyvaz śmiećcia — u 6 razoŭ, aciapleńnie i vada — prykładna ŭ 20 razoŭ.
Kali pieraličyć biełaruskuju kvartpłatu pa litoŭskich taryfach, atrymlivajecca krychu bolš za 3 miljony rubloŭ — kala $155!
Praŭda, zarobki i piensii ŭ krainach Bałtyi, viadoma ž, vyšejšyja, čym u Biełarusi. Siaredni litoviec atrymlivaje «čystymi» kala $615, a biełarus za svoj zarobak moža ciapier nabyć tolki $280.
Siaredni padychod
Ukraina i Rasija apynulisia na šlachu pamiž sacyjalistyčnym padychodam Biełarusi i kapitalistyčnym pryncypam Litvy.
U Maskvie elektryčnaść kaštuje jak i ŭ Minsku. A voś aciapleńnie i padahreŭ vady ŭtraja daražejšyja.
U vyniku ŭsia kvartpłata dvuchpakajoŭki kaštavała b kala 900 tysiač rubloŭ — $44 u ekvivalencie. Za siaredni zarobak čystymi rasiejec moža nabyć $370.
Aciapleńnie ŭ Kijevie faktyčna jak u Maskvie, a voś techničnaje absłuhoŭvańnie — jak u nas. U vyniku kvartpłata kaštuje $37. Pry ŭkrainskich zarobkach heta vialikaja ličba.
