Na terytoryi Mahilova uviedzieny kurortny zbor. Takoje rašeńnie pryniataje Mahiloŭskim haradskim savietam deputataŭ.
Kurortny zbor uviedzieny 1 studzienia 2016 hoda. Jaho płacielščykami pryznajucca fizičnyja asoby, za vyklučeńniem tych, chto nakiravany na azdaraŭleńnie i sanatorna-kurortnaje lačeńnie biaspłatna ŭ adpaviednaści z zakanadaŭčymi aktami, paviedamili ŭ Mahiloŭskim harvykankamie.
Taki zbor ŭvodzicca na hod, zatym pry nieabchodnaści moža być pryniataje anałahičnaje rašeńnie, paviedamiŭ BiełaPAN staršynia Mahiloŭskaha haradskoha savieta deputataŭ Siarhiej Ivanoŭ. Pavodle jaho słoŭ, inicyjatyva ŭviadzieńnia kurortnaha zboru zychodzić ad harvykankama i nacelenaja na papaŭnieńnie biudžetu horada z dapamohaj adnaho z dazvolenych zakanadaŭstvam miascovych zboraŭ.
«My stvaryli na ŭzroŭni horada zakanadaŭčuju bazu, ale praktyčnuju realizacyju pakul nie pačynali», — adznačyŭ Ivanoŭ. Jon paviedamiŭ, što jašče nieabchodnaja najaŭnaść viedamasnych narmatyŭnych aktaŭ pa vyznačeńni, jakija arhanizacyi i za jakija pasłuhi buduć spahaniać kurortny zbor. Tym bolš što sanatorna-kurortnych ustanoŭ — sanatoryjaŭ, pansijanataŭ, damoŭ adpačynku, lačebnic — na terytoryi Mahilova niama.
Zhodna z raspaŭsiudžanaj Mahiloŭskim harvykankamam infarmacyi, padatkovaja baza kurortnaha zboru vyznačajecca zychodziačy z koštu pucioŭki ŭ sanatorna-kurortnuju i azdaraŭlenčuju arhanizacyju. Staŭka zboru składzie «3% padatkovaj bazy». Padatkovym pieryjadam kurortnaha zboru pryznajecca kalandarny kvartał. Suma zboru vyličajecca jak vytvornaje padatkovaj bazy i staŭki kurortnaha zboru.
Vypłata kurortnaha zboru budzie ažyćciaŭlacca płacielščykami šlacham pieradačy sum sanatorna-kurortnym abo azdaraŭlenčym arhanizacyjam, jakija ažyćciaŭlajuć pryjom i pieralik hrošaj u biudžet Mahilova nie paźniej za 22-ju ličbu miesiaca, nastupnaha za minułym padatkovym pieryjadam.
Sanatorna-kurortnyja i azdaraŭlenčyja arhanizacyi pavinny nie paźniej za 25-ju ličbu miesiaca, nastupnaha za minułym padatkovym pieryjadam, padać u padatkovy orhan infarmacyju ab pieraličeńni kurortnaha zboru ŭ advolnaj formie.
Padatkovaja dekłaracyja pa kurortnamu zboru nie padajecca. Sumy kurortnaha zboru nie ŭklučajucca indyvidualnymi pradprymalnikami ŭ vydatki pa vytvorčaści i realizacyi tavaraŭ (rabot, pasłuh), majomasnych pravoŭ, što ŭličvajucca pry padatkaabkładańni.
