U Homielskim rajonie 22 studzienia prajšła akcyja pamiaci Michała Žyźnieŭskaha — biełarusa, jaki zahinuŭ dva hady tamu na vulicy Hrušeŭskaha ŭ Kijevie.
Na mahile Žyźnieŭskaha ŭ vioscy Ściah Pracy Homielskaha rajona sabralisia jaho svajaki, hramadskija aktyvisty, pradstaŭniki apazicyi i tvorčaj intelihiencyi z Homiela i Minska. Jany ŭskłali da pomnika kvietki i vianki, zapalili śviečki. Ź Minska ušanavać pamiać Žyźnieŭskaha pryjechali kala 50 čałaviek.
Dakumientalist i hramadskaja aktyvistka Volha Mikałajčyk adznačyła, što Michał Žyźnieŭski, jaki zahinuŭ va ŭzroście 26 hadoŭ, jak nacyjanalny hieroj Kastuś Kalinoŭski, addaŭ svajo žyćcio za svabodu inšych ludziej, za svabodu Ukrainy. Pavodle jaje, dziakujučy podźvihu Michaiła inšyja ludzi ŭbačyli, jak treba zmahacca, achviaravać u imia svabody inšych, u imia chryścijanskaj idei vyzvaleńnia ad rabstva čałaviečaha duchu.
Staršynia abłasnoj arhanizacyi Sajuza biełaruskich piśmieńnikaŭ Anatol Baroŭski u svaju čarhu adznačyŭ: prysutnyja hanaracca tym, što ŭ Biełarusi jość takija mužnyja aduchoŭlenyja ludzi, jak Michaił, jakija achviarujuć svaim žyćciom dla ščaścia i svabody inšych. «Ja budu nieŭzabavie ŭ Kijevie, pieradam padziaku ukrainskim siabram, piśmieńnikam za toje, što jany šanujuć pamiać našaha Michaiła. Jak pisaŭ Kalinoŭski, nie budzie ščaścia, pakul maskal budzie nad nami. Daj Boh, kab ukraincy, dy i my, vyzvalilisia z hetych putaŭ drapiežnaha susieda», — dadaŭ piśmieńnik.
