Svojeasablivy sajuz pamiž apazicyjnymi, nacyjanalistyčnymi ŚMI i ŭładnymi strukturami Biełarusi namieciŭsia jašče letaś i byŭ vyklikany padziejami ŭ Krymie i ŭ Danbasie, zajaviŭ 22 studzienia ahienctvu Eurasia Daily (EADaily) Kirył Aviarjanaŭ-Minski, jaki raniej žyŭ u Biełarusi, ale źjechaŭ u Rasiju, abo Vialikarosiju, jak piša jon sam.
Kirył Aviarjanaŭ-Minski. Fota z asabistaj staronki
Hety palitołah ŭžo nazyvaŭ biełaruski narod štučnym farmiravańniem («nijakaha» bratniaha naroda» u eks-BSSR niama»), abvinavačvaŭ Łukašenku ŭ «samaścijnaj jerasi» i dapuskaŭ vierahodnaść abviaščeńnia «narodnych respublik na ŭschodzie (a potym, mahčyma, i na zachadzie) siońniašniaj RB».
Na hety raz Aviarjanava začapiła historyja nastaŭnicy fiziki i astranomii mazyrskaha liceja Kaciaryny Kašo, jakaja pad nikami @Russian Girl i @_belka_strelka pisała hnieŭnyja pasty pra «chachłoŭ» i «da***baŭ». Z časam stała viadoma, što błohierka bolš u licei nie pracuje: zvolniłasia «pa ŭłasnaj inicyjatyvie». Žurnalisty sprabavali źviazacca z samoj mazyrskaj nastaŭnicaj, ale taja admoviłasia što-niebudź kamientavać.
Sychod Kaciaryny Kašo sa škoły Aviarjanaŭ nazyvaje čarhovym prykładam partniorstva pamiž nacyjanalistami i ŭładaj u Biełarusi.
«My možam ŭzhadać historyju z pomnikam Puškinu ŭ Mahilovie, — piša Aviarjanaŭ, — kali paśla isteryki ŭ nacyjanalistyčnych ŚMI ŭłady horada prybrali z pomnika tabličku ź vieršam «Klevietnikam Rośsii», napisanym u suviazi z razhromam Polskaha paŭstańnia 1830-31 hadoŭ. Reč u tym, što polski miaciež ličycca nacyjanalistami biełaruskim vyzvalenčym paŭstańniem. Taksama možna ŭzhadać historyju ź viciebskaj hazietaj «Naša pravasłaŭje», kali paśla publikacyi ŭ apazicyjnaj presie vydańniu było vyniesiena papiaredžańnie Ministerstva infarmacyi».
U sakavickim numary haziety za 2015 hod była nadrukavana hutarka z Marharytaj Zajdler, hramadziankaj Hiermanii, jakaja vajuje na baku bajavikoŭ «Navarosii». Zajdler zaklikała pravasłaŭnych viernikaŭ da ŭdziełu ŭ hetaj vajnie. Mnohija zadalisia pytańniem, ci nie było ŭ tym materyjale «prapahandy vajny», jakaja padpadaje pad artykuł 123 KK Respubliki Biełaruś. A mininfarm zrabiŭ adpaviednuju vysnovu.
«Paśla Kryma i Navarosii Łukašenka pierajšoŭ da davoli nacyjanalistyčnaj rytoryki, adpaviadnaj toj, jakoj užo šmat hadoŭ prytrymlivajecca apazicyja, jakaja da apošniaha času žorstka krytykavała biełaruskaha prezidenta», — robić vysnovu palitołah.
«I historyja z Kaciarynaj Kašo akurat źjaŭlajecca čarhovym prykładam takoha «pryvatna-dziaržaŭnaha» partniorstva», — reziumavaŭ Aviarjanaŭ-Minski dla Eurasia Daily.
