Bajeviki «Isłamskaj dziaržavy» pašyrajuć svaju prapahandu ŭ interniecie pierš za ŭsio praź videaroliki, i vielmi časta — praz vykarystańnie znajomych moładzi vobrazaŭ z kampjutarnych hulniaŭ.
Pra heta napisaŭ navukovuju pracu daśledčyk Univiersiteta Džordža Vašynhtona Chaŭjer Lesaka, jaki praanalizavaŭ 845 videa, što IDzIŁ raspaŭsiudžvała z pačatku 2014 pa vierasień 2015 hoda.
Akazałasia, što 15% ź ich pabudavanyja na vobrazach i mietadach z zachodnich kinafilmaŭ i hulniaŭ.
Faktyčna isłamisty vykarystoŭvajuć markietynh i ličbavyja kamunikacyi nie tolki kab pašyrać svaje idei i tłumačyć svaje ŭčynki, ale i dla taho, kab zrabić sam teror jak mietad papularnym, pažadanym i «krutym» u vačach moładzi.
Takim ža čynam «krutaść» dazvalaje adklučyć u padletkaŭ dumki pra maralnaść ci amaralnaść učynkaŭ.
«IDzIŁ vykarystoŭvaje ŭnikalnuju i składanuju aŭdyjovizualnuju stratehiju, jakaja hłyboka ŭbudavanaja i efiektyŭna dziejničaje ŭ kultury metavych aŭdytoryj», — piša Chaŭjer Lesaka.
U rolikach časta sustrakajecca muzyka i videašerah z papularnych filmaŭ i hulniaŭ — takich jak «V značyć viendeta», «Amierykanski snajpier», Sall of Duty, Mortal Combat X i Gran Theft Auto.
Taksama IDzIŁ vykarystoŭvaje roznyja hrupy dla pracy z metavymi aŭdytoryjami z roznych krain i roznyja movy. Hetak sa 120 rolikaŭ, jakija nie pryznačalisia dla arabamoŭnych i ciurkamoŭnych aŭdytoryj, 27% zroblenyja na anhielskaj movie, 15% na rasiejskaj, 13% na francuzskaj i 3% na niamieckaj.
Upieršyniu ŭ sučasnaj historyi terarystyčnaja hrupoŭka źviartajecca naŭprost da emocyj i ambicyj moładzi, amal kožny dzień stvarajučy novy rolik na rodnaj movie hetaj aŭdytoryi i z vykarystańniem znajomych dla jaje vobrazaŭ, piša daśledčyk.