U Mahilovie muža i žonku abvinavačvajuć u machlarstvie, ździejśnienym u asabliva bujnym pamiery. Zamožnaja siamja nazvałasia małazabiaśpiečanaj i atrymała lhoty dla budaŭnictva žylla. U śledstva jość padstavy mierkavać, što heta nie adzinkavy vypadak supraćpraŭnych dziejańniaŭ abvinavačanych.
Abvinavačanyja — pradprymalniki sa značnym prybytkam i hramadzianie zabiaśpiečanyja — naŭmysna prynizili sukupny dachod i majomasnaje stanovišča svajoj siamji. Jany padali łžyvyja źviestki, pavodle jakich ich siamja z 5 čałaviek nibyta naležyć da katehoryi małazabiaśpiečanych.
Na padstavie hetych dakumientaŭ siamji dali biazvypłatnuju subsidyju na budaŭnictva žylla. Taksama abvinavačanyja atrymali finansavuju dapamohu dziaržavy, pryznačanuju dla pahašeńnia lhotnaha kredytu. U tym liku siamju zaćvierdzili ŭ śpisie hramadzian, jakija majuć patrebu ŭ palapšeńni žyllovych umoŭ i majuć prava na atrymańnie lhotnaha kredytu. Na imia abvinavačanaj była adkrytaja kredytnaja linija.
Abvinavačanyja — va ŭzroście 50 i 47 hadoŭ — znachodziacca pad vartaj. Ich majomaść aryštavali, a heta: try kaviarni, haścinica, administracyjna-vytvorčy korpus, dźvie kvatery i aŭtamotatechnika, paviedamiła aficyjny pradstaŭnik USK pa Mahiloŭskaj vobłaści Aksana Salaniuk.
