U Homielskaj vobłaści adznačajecca siezonny rost zachvorvańnia na VRI, charakterny dla hetaha pieryjadu hoda, zafiksavanyja taksama vypadki hrypu H1N1. U paraŭnańni z anałahičnym pieryjadam minułaha hoda zachvorvańnie na VRI nižejšaje na 18%.
Jak paviedamlaje Homielski abłasny centr hihijeny, epidemijałohii i hramadskaha zdaroŭja, siarod chvorych pieravažajuć dzieci — 68%. U kantrolnych haradach vobłaści (Homiel, Mazyr, Rečyca) zachvorvańnie na VRI nie pieravyšaje raźlikovyja ŭzroŭni, ustanoŭlenyja Ministerstvam achovy zdaroŭja.
Pa vynikach malekularna-bijałahičnych i sierałahičnych daśledavańniaŭ ustanoŭlena, što pieravažna cyrkulujuć niehrypoznyja reśpiratornyja virusy: adenavirusy, reśpiratorna-sintycyjalny virus, parahryp, na fonie jakich rehistrujucca sparadyčnyja vypadki hrypu A(H1N1 pdm) i V, charakternyja dla hetaha pieryjadu hoda.
Epidemijałahičnaja situacyja pa zachvorvańni na vostryja reśpiratornyja infiekcyi znachodzicca na pastajannym kantroli sanitarna-epidemijałahičnaj słužby vobłaści i ŭpraŭleńnia achovy zdaroŭja, adznačaje Homielski abłasny centr hihijeny, epidemijałohii i hramadskaha zdaroŭja.
Na 28 studzienia ŭ vobłaści zarehistravana siem vypadkaŭ hrypu H1N1, jaki nazyvajuć śvinym, — u Homieli, Dobrušskim i Rahačoŭskim rajonach.
Razam z tym, pavodle niepaćvierdžanych źviestak, na śviny hryp chvareli niekatoryja žychary Akciabrskaha rajona. U rajonnym centry hihijeny, epidemijałohii i hramadskaha zdaroŭja abviarhajuć hetuju infarmacyju, jak i paviedamleńni pra śmierć pacyjentaŭ ad virusnaj pnieŭmanii.
Žychar Akciabrskaha Mikałaj zaraz znachodzicca ŭ Homielskaj abłasnoj tubierkuloznaj balnicy z dvuchbakovym zapaleńniem lohkich. «Mnie kazali, što ŭ mianie śviny hryp, a aficyjna ja nie maju infarmacyi, papier ja nie bačyŭ. Pačynałasia chvaroba z vysokaj, bolš za 39 hradusaŭ, tempieratury, jakaja nie źbivałasia. Byŭ lohki suchi kašal. Potym vyjavili zapaleńnie, trapiŭ u reanimacyju, ciapier užo pieraviali ŭ zvyčajnuju pałatu», — zajaviŭ pacyjent.
U jaho ziemlaka, žychara rajcentra, hramadskaha aktyvista Andreja Pavuka zachvareli dzieci. «U małodšaj pnieŭmanija na pačatkovaj stadyi. U starejšaha vysokaja tempieratura była. Nakolki ja viedaju, u rajonie šmat ludziej chvareje, u tym liku na pnieŭmaniju, pryčym da reanimacyi. Śviny hryp u nas ci nie, lekary nie kažuć», — adznačyŭ aktyvist.
U administracyi rajonnaj balnicy śćviardžajuć, što nichto ad virusnych pnieŭmanij u rajonie nie pamiraŭ.
28 studzienia stała viadoma, što homielskija palikliniki buduć pracavać pa subotach i niadzielach z 29 studzienia pa 29 lutaha. Zhodna z zahadam upraŭleńnia achovy zdaroŭja Homielskaha abłvykankama, takaja miera pryniataja z metaj zabiaśpiečyć dastupnaść miedycynskaj dapamohi ŭ pieryjad siezonnaha pavyšeńnia zachvorvańnia na vostryja reśpiratornyja infiekcyi. Homielskija palikliniki buduć pracavać pa subotach z 8.00 da 18.00, pa niadzielach — z 8.00 da 14.00. Taksama ŭ vychadnyja dni možna budzie vyklikać doktara damoŭ. U dziciačych paliklinikach vykliki buduć prymać da 13.00 pa subotach i da 12.00 pa niadzielach. U darosłyja palikliniki źviarnucca pa dapamohu doma možna da 15.00 pa subotach i da 12.00 pa niadzielach.
