Staršynia Biełteleradyjokampanii Hienadź Davydźka vykazaŭsia nakont źbićcia žurnalista Paŭła Dabravolskaha ŭ budynku suda.
Tema, uźniataja ŭ prahramie «Hałoŭny efir» na «Biełaruś-1», nazyvałasia «Aściarožna, pravakacyja!».
Hienadź Davydźka, redaktar «Savieckaj Biełarusii» Pavieł Jakubovič i kiraŭnik BiełTA Dźmitryj Žuk faktyčna stali na bok milicyjantaŭ. Tolki redaktarka «Komsomolskoj pravdy» Halina Mališeŭskaja davodziła, što žurnalista źbivać nielha.
«Tut padrapanaje ściahno, — pakazaŭ Davydźka fotazdymak źbitaha Dabravolskaha. – I daje intervju, što 20 chvilin prafiesijnyja amonaŭcy źbivali… Za 20 chvilin hetaja drapina? Niedzie ŭžo chłuśnia prysutničaje. Za maleńkaj chłuśnioj zaŭsiody chavajecca vialikaja chłuśnia».
Davydźka paraŭnaŭ situacyju ź pieradumovami Majdanu: «Mnie heta nahadała Ukrainu. Kali milicyja razahnała studentaŭ, a na nastupny dzień uźniaŭsia ahromnisty šum: «Jany ž dzieci!» Heta była pravakacyja. U dadzienym vypadku heta taksama vielmi padobna da pravakacyi».
Hość studyi Alaksiej Dziermant raskazaŭ, što aznajomiŭsia ź bijahrafijaj Dabravolskaha. Maŭlaŭ, toj pracavaŭ va ŭkrainskim ŚMI «Novoje vriemia» (nasamreč byŭ na stažyroŭcy). U suviazi z hetym Dziermant aburyŭsia tym faktam, što taki čałaviek, jak Pavieł Dabravolski, uvohule pracuje na partale Tut.by. «Uźnikaje pytańnie da kadravaj palityki, — zaŭvažyŭ Dziermant. – Heta nie prosta vypadkovaść — heta linija kiraŭnictva».
Pavieł Jakubovič zajaviŭ pra nieprafiesijanalizm Dabravolskaha: «Jon padstaviŭ redakcyju, jon kinuŭ cień na karparacyju. Kali ŭsie buduć brać prykład z takich ludziej, a nie narmalnych žurnalistaŭ – z «Kamsamolskaj praŭdy», BiełTA, telebačańnia, «Našaj Nivy», «Narodnaj voli», jakija vyrašajuć pytańni ŭ adpaviednaści z zakonam… Heta čałaviek pastaviŭ siabie pa-za zakonam. Ci moža čałaviek zapłyvać za bujki tolki tamu, što jon žurnalist?»