«U nas pryniali zajavu na hastrolnaje paśviedčańnie dy paprasili pradstavić teksty piesień, jakija buduć vykonvacca. Ja dasłaŭ vieršy Ŭładzimiera Majakoŭskaha i Ryhora Baradulina, na jakija byli zapisanyja maje albomy. Mienavita Baradulinu mierkavałasia pryśviacić hety vystup, tamu i abrali 24 lutaha, dzień jaho naradžeńnia. Tydzień u idealahičnym adździele vyčytvali hetyja teksty, a potym admovili ŭ praviadzieńni», — raspavioŭ partału Tuzin.fm Źmicier Vajciuškievič.
Va ŭpraŭleńni idealahičnaj pracy Mienharvykankamu patłumačyli, što rašeńnie ab niavydačy hastrolnaha paśviedčańnia było vydadziena ŭ adpaviednaści z punktam 16 ukazu kiraŭnika dziaržavy №257. U im pieraličanyja nastupnyja pryčyny: vyjaŭlenyja ekspertnaj kamisijaj elementy prapahandy parnahrafii, hvałtu i žorstkaści, supadzieńnie času i miesca praviazieńnia mierapryjemstva ź mierapryjemstvam, raniej zaplanavanym arhanizataram, najaŭnaść u padadzienych dakumentach niepraŭdzivych źviestak, a taksama pryčynu, jakuju možna traktavać jak zaŭhodna — «parušeńnie inšych patrabavańniaŭ dadzienaha pałažeńnia dy inšych aktaŭ zakanadaŭstva». Bolš detalna kankretyzavać pryčynu admovy ŭ Mienharvykankamie admovilisia.
Arhanizataram kancertu Vajciuškieviča byŭ Leanid Dzinerštejn. «Ja lublu toje, što robić Źmicier. I jon robić moža być bolš za astatnich. Heta čystaje mastactva, i ja nie baču, što ad jaho sychodzić ahresija, nakiravanaja suprać dziaržavy. Tamu ad takoha rašeńnia škody toj ža dziaržavie bolš, čym karyści. Liču jaho absalutnaj hłupaściu», — zajaviŭ pramoŭter u kamentary dla Tuzin.fm. Jon taksama paviedamiŭ, što praź niekatory čas źbirajecca paŭtorna padać zajavu.
Na hetym tydni na atrymańnie hastrolnaha paśviedčańnia padaje taksama hurt Ciarhieja Michałka Brutto.
