Fota Radyjo Svaboda
«Pierśpiektyva» pryniała rašeńnie padać zajaŭku na mitynh pradprymalnikaŭ 15 lutaha na płoščy Banhałor. My adpravili zajaŭku 29 studzienia. My chočam urehulavać našy pytańni ŭ ramkach zakona, — zajaviŭ Anatol Šumčanka. — Ja liču, što niama nijakich padstavaŭ admović nam u hetym pravie. My hatovyja apłacić mierapryjemstva».
Akramia taho, Anatol Šumčanka prapanuje IP jašče adzin varyjant rašeńnia prablemy: sabrać podpisy i ŭnieści na razhlad uładaŭ zakonaprajekt ab pracy IP. «Pytańnie siońnia adno — dać mahčymaść pracavać tym, chto heta moža», — adznačyŭ Anatol Šumčanka. Pavodle jaho słoŭ, zbor podpisaŭ budzie pačaty paśla zakančeńnia forumu, paviedamlaje tut.by.
Pa vynikach forumu była pryniataja rezalucyja, u jakoj indyvidualnyja pradprymalniki patrabujuć pieramovaŭ z kiraŭnikom dziaržavy «dla abjektyŭnaj acenki situacyi i vypracoŭki kanstruktyŭnych šlachoŭ jaje vyrašeńnia». Zaprašeńnie na sustreču ź IP było nakiravana piersanalna Alaksandru Łukašenku, paviedamlaje BiełaPAN.
Akramia taho, udzielniki forumu zapatrabavali ŭklučyć pradstaŭnikoŭ «Pierśpiektyvy» ŭ Radu pa raźvićci pradprymalnictva pry prezidencie i hramadska-kansultacyjnyja rady pry ministerstvach na pastajannaj asnovie «dla kantrolu za narmatvorčaści uładaŭ, što zakranaje intaresy IP».
U kancy forumu arhanizatary abviaścili, što ŭ im uziali ŭdzieł try tysiačy IP z 41 horada.
Nastupny forum pradprymalnikaŭ zapłanavany na 29 lutaha.
***
Siońnia ŭ Minsku prajšoŭ čarhovy forum pradprymalnikaŭ. Z boku ŭładaŭ na mierapryjemstvie prysutničali pradstaŭniki Dziaržstandartu, Minhandlu, departamienta pradprymalnictva Minekanomiki.
Nahadajem, ipešniki prosiać ułady admianić ukaz № 222, pa jakim jany z 1 studzienia pavinny pradavać tavary lehprama tolki z supravadžalnymi dakumientami. Mnohija pradstaŭniki małoha biźniesu z-za hetaha spynili pracu. Pa ich słovach, u ich niama mahčymaści pracavać pa novych praviłach.
Pradprymalniki taksama patrabujuć admieny pałažeńniaŭ ukaza № 48 «Ab mierach pa zabieśpiačeńni dziaržaŭnaha kantrolu (nahladu) za vykanańniem patrabavańniaŭ techničnych rehłamientaŭ» u častcy administracyjnaj adkaznaści IP za parušeńnie patrabavańniaŭ techničnych rehłamientaŭ Mytnaha sajuza i Jeŭrazijskaha ekanamičnaha sajuza.
