Žanr: drama, mieładrama, bijahrafija
Režysior: Tom Chupier
U rolach: Edzi Redmejn, Alisija Vikander, Tacias Šonarts, Bien Uišaŭ, Embier Chiord, Siebaśćian Koch
Vialikabrytanija, ZŠA, Bielhija, Danija, Hiermanija, 119 chv.
Adznaka: 7
Kapienhahien, 1920-ja. Mastačka Hierda Viehienier prosić svajho muža Ejnara papaziravać u jakaści žanočaj madeli. Niečakana Ejnar adčuvaje ŭnutrany rezanans z novym vobrazam, a karciny nabyvajuć papularnaść. Hierda praciahvaje pisać partrety sa svaim mužam u vobrazie žančyny. Ejnaru padabajecca ŭłasny žanočy vyhlad, i jon pačynaje žyć pad imiem Lili Elbie. Paśla Lili stanie pieršym čałaviekam, jaki prajšoŭ chirurhičnuju karekcyju połu.
Scenar filma režysiora Toma Chupiera («Oskar»-2011 za «Karol havoryć!») stvorany na asnovie adnajmiennaha ramana Devida Ebiershofa, jaki vyjšaŭ u 2000. Kniha zasnavanaja na aŭtabijahrafii Lili Elbie «Mužčyna ŭ žančynie», apublikavanaj u 1933. Užo ŭ joj niekatoryja faktyčnyja źviestki byli źmienienyja, kab abaranić asabistaje žyćcio Lili i jaje blizkich. U knizie Ebiershofa dola Ejnara jašče bolš ramantyzavanaja. Asabliva paciarpieła linija adnosin z Hierdaj (jaje syhrała Alisija Vikander): u realnaści jana nie vyniesła kardynalnaj źmieny asoby Ejnara, atrymała razvod i vyjšła zamuž za inšaha mužčynu.
Stvaralniki filma skancentravalisia na pracesie ŭnutranaj źmieny asoby Ejnara. Značnaja častka času adviedzienaja na adnosiny z žonkaj Hierdaj, jakaja prymaje takuju źmienu, jak ciažka joj heta ni davałasia b, i zastajecca ź Lili da jaje śmierci paśla druhoj apieracyi.
Cikava, što ŭzajemadziejańnie sa śvietam pakazana mała: pieršyja źjaŭleńni Lili ŭspryniatyja, chutčej, jak žart, a kansultacyi ź psichijatrami źviedzienyja da niekalkich chvilin ekrannaha času.
Hałoŭnuju rolu vykanaŭ brytaniec Edzi Redmejn, jaki letaś atrymaŭ «Oskar» za najlepšuju rolu ŭ filmie «Suśviet Styviena Chokinha», syhraŭšy viadomaha navukoŭca.
Pierš čym raspačać zdymki, Edzi dva hady vyvučaŭ žyćcio transhiendarnaj supolnaści. Jon pryznaŭsia, što z žacham daviedaŭsia pra statystyku: 41% transhiendarnych ludziej skančajuć žyćcio samahubstvam.
«Ja adčuvaŭ vialikuju adkaznaść za svaju pracu. Lili — heta ekstraardynarnaja žančyna, jana — ikona dla transhiendarnaha kamjunici, i ja jak akcior byŭ ščaślivy, što mnie vypała syhrać takuju rolu»,— skazaŭ Redmejn. Dla roli jamu daviałosia schudnieć na siem kil.
Zdymki prachodzili ŭ Łondanie, Bruseli i Kapienhahienie.
Stužka atrymała niekalki naminacyj na «Oskar»-2016. Asabliva amierykanskaja kinaakademija adznačyła ihru Edzi Redmejna i Alisii Vikander: jany atrymali naminacyi «Najlepšaja mužčynskaja rola» i «Najlepšaja žanočaja rola druhoha płana».
Film maje ŭzrostavaje abmiežavańnie 18+.
***
Transhiendarnaść niesupadzieńnie hiendarnaj identyčnaści čałavieka z prypisanym pry naradžeńni połam. Sama pa sabie nie źjaŭlajecca chvarobaj. Adnak niekatoryja transhiendarnyja ludzi adčuvajuć ŭ suviazi ź nieadpaviednaściu svajho samaadčuvańnia i čakańniaŭ navakolnych mocny stres, jaki moža surjozna adbivacca na ich zdaroŭi i jakaści žyćcia. Časta aptymalnym rašeńniem źjaŭlajecca transhiendarny pierachod.
***
Adna z samych znakamitych transhiendaraŭ — režysiorka Łana Vačoŭski, siastra Endzi Vačoŭski (tryłohija «Matryca»). Jana ŭładalnica partreta Lili Elbie, vykananaha Hierdaj Viehienier. Dziakujučy Łanie padčas pracy nad filmam Vačoŭski «Uzychod Jupicier» (2015) Edzi Redmejn bližej paznajomiŭsia z historyjaj Ejnara (Lili) i Hierdy Viehienier. U 2012 Łana Vačoŭski publična raskazała pra ciažkaści transhiendarnaha pierachodu i atrymała Visibility Award ad «Kampanii za pravy čałavieka», najbujniejšaj ŁHBT-arhanizacyi ZŠA.
