Kanfierencyja Katalickich Biskupaŭ u Biełarusi na 62-m plenarnym pasiadžeńni 4 lutaha 2016 h. abmierkavała pytańnie, źviazanaje ź niadaŭnim vykazvańniem Upaŭnavažanaha pa spravach relihij i nacyjanalnaściaŭ spadara Hulaki Ł.P. 2 lutaha 2016 hoda, jakoje datyčyła dziejnaści Katalickaha Kaścioła ŭ našaj krainie, paviedamlaje catholic.by
Kanfierencyja Katalickich Biskupaŭ u Biełarusi ličyć nieabchodnym źviarnuć uvahu na nastupnaje:
1. Sprava padrychtoŭki śviataroŭ źjaŭlajecca vyklučna ŭnutranaj spravaj Kaścioła, jaki kłapocicca pra svaju budučyniu (darečy, u hetym hodzie 19 čałaviek raspačali navučańnie ŭ sieminaryjach Biełarusi i ŭ manaskich sieminaryjach za miažoj), i abvinavačvać jaho ŭ niezacikaŭlenaści i niedastatkovaści «pracy z kadrami» vyhladaje biespadstaŭna.
2. Što datyčyć katalickaj teałahičnaj akademii imia śviatoha Jana Paŭła II, to jana zarehistavana, ciapierašni etap — atrymańnie ziamielnaha nadziełu, dalej — uźviadzieńnie budynka, i paśla hetaha akademija raspačnie svaju dziejnaść, što taksama źjaŭlajecca vyklučna ŭnutranaj spravaj Kaścioła.
3. Inšyja ŭźniatyja spadarom Hulakam Ł.P. temy mohuć być abmierkavany pry asabistaj sustrečy Kanfierencyi Katalickich Biskupaŭ u Biełarusi z Upaŭnavažanym pa spravach relihij i nacyjanalnaściaŭ.
U aŭtorak, 2 lutaha, upaŭnavažany pa spravach relihij i nacyjanalnaściaŭ Biełarusi Leanid Hulaka na kalehii Aparatu Upaŭnavažanaha pa spravach relihij i nacyjanalnaściaŭ zajaviŭ, što Rymska-katalickaja carkva ŭ Biełarusi niedastatkova aktyŭna pracuje pa padrychtoŭcy śviataroŭ.
«Rymska-katalickaja carkva ŭ Biełarusi, jak i raniej, niedastatkova aktyŭna pracuje pa padrychtoŭcy kadraŭ. Naprykład, u Pinskaj sieminaryi ŭ 2015 hodzie nie było nivodnaha vypusknika i ŭsiaho adzin čałaviek pastupiŭ na pieršy kurs. U katalickaj teałahičnaj akademii, što adkryłasia ŭ 2015 hodzie, niama nivodnaha navučenca, i, jak śledstva, jość kadravaja prablema i zaprašeńnie vialikaj kolkaści śviataroŭ z-za miažy», — adznačyŭ Leanid Hulaka.
Pry hetym, pavodle jaho słoŭ, niekatoryja zamiežnyja śviatary słaba vałodajuć navykami znosin na dziaržaŭnych movach Respubliki Biełaruś i redka vykarystoŭvajuć ich dla praviadzieńnia nabaženstvaŭ, što vyklikaje spraviadlivyja skarhi viernikaŭ
