Paśla taho, jak jaje zatrymali za jazdu napadpitku, jana pasprabavała źbiehčy.
Jak paviedamlaje pres-słužba DAI Bresckaj vobłaści, incydent adbyŭsia ŭ horadzie nad Buham rana ranicaj 6 lutaha. Kala pałovy na piatuju na vulicy Pijanierskaj uvahu supracoŭnikaŭ DAI pryciahnuŭ aŭtamabil «Folksvahien Poła». Kiroŭca nieadekvatna siabie pavodziŭ — «vichlaŭ» pa darozie z boku ŭ bok. Potym mašyna raptam spyniłasia na prypynku hramadskaha transpartu «Kijeŭskaja». Inśpiektary paśpiašalisia da aŭtamabila, dzie ŭbačyli za rulom maładuju dziaŭčynu, ad jakoj pachła ałkaholem.
Pradjaŭlać paśviedčańnie kiroŭcy i dakumienty na aŭtamabil dziaŭčyna kateharyčna admoviłasia, skazaŭšy, što mašynu «ŭziała pakatacca ŭ maładoha čałavieka». Vyjaviłasia, što «Poła» naležyć adnamu z bresckich pradpryjemstvaŭ. Haspadar u hety čas byŭ «niedastupny».
Dziaŭčyna pavodziła siabie ahresiŭna, a paśla taho jak jaje pasadzili na zadniaje siadzieńnie patrulnaha aŭtamabila, jana vyrašyła źbiehčy, vybiŭšy nahami škło. Adnak ŭcioki nie ŭdalisia. Paśla vykliku śledča-apieratyŭnaj hrupy, dziaŭčynu dastavili ŭ narkałohiju, dzie ŭ jaje vyjavili 0,87 pramile ałkaholu.
Jak vyśvietliłasia, «chulihanka» — 22-hadovaja žycharka Małaryckaha rajona, jakaja nikoli nie mieła paśviedčańnia kiroŭcy. Načnoje padarožža dla jaje skončyłasia ŭ Maskoŭskim RAUS. U dačynieńni dziaŭčyny byli składzienyja adrazu 3 administracyjnyja pratakoły — za pjanuju jazdu, znachodžańnie za rulom biez prava kiravańnia i niepadparadkavańnie zakonnamu patrabavańniu słužbovaj asoby.
Aŭtamabil byŭ pastaŭleny na štrafnuju stajanku.
