 |
Kančatkovaje rašeńnie pa budaŭnictvie zavodu hierbicydaŭ u Puchavickim rajonie prymie ŭrad Biełarusi. Ab hetym paviedamiła karespandentu BIEŁTA namieśnik ministra achovy zdaroŭja, hałoŭny dziaržaŭny sanitarny ŭrač Valancina Kačan.
Zaklučeńnie vydadziena ŭ adpaviednaści z zakanadaŭstvam i dziejučymi narmatyŭna‑pravavymi aktami, i padstaŭ dla vydačy inšaha ŭ Ministerstva achovy zdaroŭja niama, padkreśliła namieśnik ministra. Na jaje dumku, u toj sytuacyi, što ŭźnikła ŭ Puchavickim rajonie i atrymała hramadzki rezanans, mnohaje padahravajecca emocyjami, a nie razumnym sensam.
«My pavinny razumieć, što žyviom u pravavoj dziaržavie, i lubyja rašeńni, jakija prymajucca, pavinny hruntavacca na toj zakanadaŭčaj bazie i na tych narmatyŭna‑pravavych aktach, što isnujuć u krainie i adpaviadajuć suśvietnym standartam u halinie zakanadaŭstva», — skazała Valancina Kačan. «Maja asabistaja hramadzianskaja pazycyja i jak čałavieka, i jak deputata, jaki maje vopyt raboty z nasielnictvam, zaklučajecca ŭ tym, što kanflikt byŭ štučna padahrety tymi ludźmi, jakija vykazvajuć «miestačkovyja» intaresy», — dadała namieśnik ministra. Pa‑sutnaści, prapanavany prajekt praduhledžvaje ŭkładańnie važkich investycyj, u tym liku i zamiežnych, stvareńnie novych rabočych miescaŭ i adkryvaje dla rehijonu novyja perspektyvy raźvićcia.
Biezumoŭna, pry pryniaćci rašeńnia ab budaŭnictvie abjekta, źviazanaha z pryrodaachoŭnym zakanadaŭstvam i zdaroŭjem nasielnictva, buduć uličany ŭsie patrabavańni ekalahičnaj biaśpieki, padkreśliła Valancina Kačan.
