Za miažoj bolš biaśpiečna vykarystoŭvać kartku z čypam, a nie mahnitnaj pałasoj, paviedamiŭ načalnik hałoŭnaha ŭpraŭleńnia raźvićcia ličbavych bankaŭskich technałohij Nacyjanalnaha banka Biełarusi Alaksandr Sotnikaŭ.
Raniej niekatoryja biełaruskija banki papiaredzili klijentaŭ ab zabaronie na źniaćcie najaŭnych srodkaŭ z kartak biez čypa za miažoj.
«Heta absalutna razumnaje rašeńnie banka dla minimizacyi ryzyk klijentaŭ. Za miažoj lepš karystacca kartkaj z čypam, a nie kartkaj z mahnitnaj pałasoj. Heta ŭ pieršuju čarhu dapamoža zabiaśpiečyć biaśpieku płaciažoŭ samich klijentaŭ, tamu takoje rašeńnie banka łahičnaje. Da taho ž zamianić kartku z mahnitnaj pałasoj na kartku z čypam nie ŭjaŭlaje ciažkaści», — adznačyŭ Alaksandr Sotnikaŭ.
Pradstaŭnik Nacbanka nahadaŭ, što ŭ Biełarusi emisija kartak mižnarodnych płaciežnych sistem vyklučna z mahnitnaj pałasoj z 1 lipienia 2015 hoda spyniena. «My ruchajemsia da taho, kab u bližejšy čas va ŭsich byli čypavyja kartki. Tamu ŭ rašeńniach bankaŭ ja nie baču asablivych prablem», — dadaŭ jon.
Abmiežavańni ŭvodziacca taksama dla klijentaŭ niekatorych bankaŭ na źniaćcie najaŭnych srodkaŭ z kartak za miažoj. «Praktyka zabarony zdymać hrošy ŭ krainach z vysokaj ryzykaj machlarstva isnuje ŭžo daŭno i prymianiajecca mnohimi biełaruskimi bankami. Heta absalutna narmalnaja situacyja, jakaja nie aznačaje ŭviadzieńnia zabarony na raźliki za miažoj - abmiežavańni ŭvodziacca tolki ŭ tych krainach, dzie davoli vysoki ŭzrovień machlarstva. Takija zachady robiacca, kab abaranić trymalnikaŭ kartak ad patencyjalnaha machlarstva», — prakamientavaŭ Alaksandr Sotnikaŭ. Pry nieabchodnaści da takich mier źviartajucca i zamiežnyja banki, ustanaŭlivajučy abmiežavańni dla peŭnych krain.
Jak paviedamlałasia, Biełarusbank uvioŭ časovyja abmiežavańni na źniaćcie najaŭnych srodkaŭ z kartak za miažoj. Takoje rašeńnie pryniata ŭ suviazi ź infarmacyjaj ab pavieličeńni kolkaści machlarskich apieracyj u šerahu zamiežnych krain, adznačyli ŭ banku. Źniaćcie hrošaj u bankamatach z dapamohaj kartak, jakija majuć mikrapracesar (čyp) i mahnitnuju pałasu, prypyniena da 20 kastryčnika 2017 hoda ŭ niekatorych krainach dalokaha zamiežža. Kali havaryć ab kartkach MasterCard, to heta Kambodža, Hankonh, Małajzija, Niepał, Filipiny, Vjetnam, Respublika Kareja, Indyja, Indaniezija, Tajłand, Kitaj, Japonija, ZŠA. Što datyčycca VISA i Maestro, to heta Niepał, Indyja, Indaniezija, Tajłand, Kitaj, Japonija i ZŠA.
Praviadzieńnie apieracyj źniaćcia najaŭnych srodkaŭ u bankamatach z płaciežnych kartak fizičnych asob, vypuščanych tolki z mahnitnaj pałasoj, časova prypyniena va ŭsich zamiežnych krainach.
Infarmacyja ab abmiežavańniach pry raźlikach kartkami z mahnitnaj pałasoj i źniaćci hrošaj za miažoj z 1 sakavika raźmieščana taksama na sajcie BTA banka.
