Kala 30 indyvidualnych pradprymalnikaŭ vyjšli siońnia na płošču Lenina da Doma savietaŭ u Mahilovie. Pry hetym pradprymalniki nie razhortvali jakich-niebudź transparantaŭ, jany prosta hutaryli pamiž saboj.
Akramia taho, delehacyja IP z šaści čałaviek naviedała abłvykankam, dzie sustrelisia z načalnikam upraŭleńnia pradprymalnictva Viktaram Krasoŭskim. Svaju sustreču z čynoŭnikam jany nazvali biezvynikovaj. «Ja nie viedaju, dla čaho hetaja sustreča była. Zachacieli asobnyja pradstaŭniki pahutaryć z Krasoŭskim. Sensu nijakaha ŭ hetaj sustrečy niama. Ja ad Krasoŭskaha ničoha nie čakaju, jon ničoha nie moža», — zajaviŭ paśla sustrečy adzin z pradprymalnikaŭ, jaki ŭdzielničaŭ u joj.
Jašče adzin udzielnik vizitu ŭ abłvykankam paviedamiŭ, što paŭtornaja sustreča ź IP projdzie ŭ abłvykankamie ŭ sieradu ŭ 11 hadzin: «Buduć usie słužby, i nas buduć znoŭ słuchać. Dakumienty našy pahladziać i skažuć, ci možna pa im pracavać ci nie». Jon taksama adznačyŭ, što nie ŭsie prysutnyja siońnia na płoščy Lenina ŭ Mahilovie padtrymlivajuć akcyju ŭ Minsku. «Akcyju ŭ Minsku chtości padtrymlivaje, chtości nie padtrymlivaje», — skazaŭ pradprymalnik.
Jak paviedamiŭ mahiloŭski pradprymalnik, jaki ŭdzielničaŭ u mitynhu ŭ Minsku, mahiloŭcaŭ na im było kala 50 čałaviek. Da stalicy jany dabralisia bieź incydentaŭ.
