Žanr: fantastyka, bajavik, kamiedyja
Režysior: Cim Miler
U rolach: Rajan Rejnalds, Marena Bakaryn, Ed Skrejn, CiDžej Miler, Džyna Karana, Bryjana Chiłdebrand.
ZŠA, Kanada, 108 chv.
Adznaka: 7.
Uejd Uiłsan — były śpiecnazaviec, a ciapier najmit. Jon zachvareŭ na rak i pahadziŭsia na niebiaśpiečny ekśpierymient, jaki nadzialiŭ jaho paskoranaj rehienieracyjaj, ale źniešnie zrabiŭ padobnym da pačvary.
Paśla hetaha Uejd biare sabie imia Dedpuł i robicca supierhierojem z novymi zdolnaściami i čornym pačućciom humaru. Ciapier jaho meta — upalavać čałavieka, jaki amal razburyŭ jaho žyćcio.
Dedpuł, hieroj komiksaŭ Marvel pra mutantaŭ, byŭ stvorany mastakom Robam Łajfiełdam i piśmieńnikam Fabijani Nicijozaj i ŭpieršyniu źjaviŭsia ŭ «The New Mutants» # 98 (luty 1991).
U komiksach Dedpuł pakutavaŭ na šyzafreniju i časta razmaŭlaŭ sam z saboj. U filmie zrabili pa-inšamu: jon raźbivaje «čaćviortuju ścianu» i naŭprost źviartajecca da hledačoŭ, jak rabiŭ heta ŭ kampjutarnych hulniach i multfilmach.
Na vialikim ekranie Dedpuł epizadyčna źjaviŭsia ŭ filmie «Ludzi Iks: Pačatak. Rasamacha» (2009 ). Za hod da taho akcior Rajan Rejnalds źviazaŭsia z kinastudyjaj 20th Century Fox i prapanavaŭ svaju kandydaturu: jon nie raz kazaŭ, što syhrać Dedpuła — jaho mara. Pieršapačatkova scenar «Rasamachi» byŭ žorstkim i mieŭ rejtynh R (da 17 hadoŭ z supravadžeńniem), ale Chju Džekman nastojvaŭ na rejtynhu PG-13, i scenar byŭ mocna pierapracavany. Rola Uejda Uiłsana była całkam źmienienaja — jon staŭ antyhierojem, praciŭnikam hrupy mutantaŭ na čale z prafiesaram Iks.
U Rajana Riejnoldsa i piersanaža komiksaŭ Dedpuła šmat padabienstvaŭ.
U ich abodvuch adnolkavy rost — 188 sm, koler vałasoŭ — kaštanavy i vačej — kary, jany abodva kanadcy. Rajan pačaŭ svaju akciorskuju karjeru ŭ 1991 hodzie, u hety ž hod Dedpuł u pieršy raz źjaviŭsia na staronkach komiksaŭ Marvel.
Akcior tak zachapiŭsia idejaj stvaryć śpin-of pra Dedpuła, što razam z režysioram i śpiecyjalistam pa vizualnych efiektach Cimam Mileram stvaryŭ scenar stužki i na praciahu niekalkich hadoŭ prapanoŭvaŭ jaho roznym studyjam. Zrabić film pahadziłasia 20th Century Fox, pradziusaram vystupiŭ sam Rejnalds, a biudžet skłaŭ $58 młn, što nie tak i šmat dla filma pra supierhieroja. Stvaralnikam daviałosia admovicca ad darahich scen pahoni na aŭtatrasie i niektorych śpiecefiektaŭ, kab ukłaścisia ŭ biudžet, a Rajan sam źniaŭ niekalki proma-rolikaŭ na kamieru mabilnaha telefona.
Rolu kachanaj Uejda vykanała aktrysa brazilskaha pachodžańnia, zorka sieryjałaŭ Marena Bakaryn. Mutantku Aniolski Pył syhrała amierykanskaja kikbaksiorka i aktrysa Džyna Karana. U roli złodzieja Ajaksa źjaviŭsia zorka «Hulni tronaŭ» Ed Skrejn.
Zdymki prachodzili ŭ Vankuviery viasnoj 2015-ha i zaniali 48 dzion.
Stužka była vysoka acenienaja kinakrytykami i amatarami komiksaŭ, niahledziečy na žorstkija sceny raspravy i nie tolki čorny, ale i nizki humar. Heta pieršy film franšyzy «Ludzi Iks», jakomu prysvojeny rejtynh R (da 17 hadoŭ z supravadžeńniem).
