U Biełarusi praviaduć pravierku hatoŭnaści vojskaŭ terytaryjalnaj abarony. Takoje daručeńnie daŭ siońnia Alaksandr Łukašenka, vystupajučy pierad udzielnikami zboru pa terytaryjalnaj abaronie.
Pa kamandzie kiraŭnika krainy ŭ Biełarusi buduć zadziejničany vojski terytaryjalnaj abarony. «Dziaržsakrataryjatu daručaju, kab u niejki pramiežak času (treba vybrać hety čas) my mahli pa majoj kamandzie zadziejničać vojski terytaryjalnaj abarony ŭ rajonie, horadzie i na inšaj terytoryi ŭ maštabach vobłaści. Pahladzim, jak dziejničajuć vojski terytaryjalnaj abarony», - skazaŭ Alaksandr Łukašenka.
Kiraŭnik dziaržavy adznačyŭ, što ŭ Biełarusi jość płany prymianieńnia vojskaŭ terytaryjalnaj abarony, vyznačany abjekty, jakija jany pavinny achoŭvać. Alaksandr Łukašenka padkreśliŭ, što jaho niepakoić inšaje: «Płany jość, abjekty jość, papiery jość, ludzi, kamandziry i inšaje, a ci hatovy my dziejničać u vajennych umovach i zadziejničać usiu terytaryjalnuju abaronu?».
U mirny čas orhanami kiravańnia terytaryjalnaj abarony źjaŭlajucca Hienieralny štab, miascovyja orhany ŭłady, vajennyja kamisaryjaty. Kiraŭnik krainy padkreśliŭ, što treba, kab kožny hienierał-hubiernatar, staršynia harvykankama viedali, jak dziejničać, mieli ŭjaŭleńnie ab kolkasnym składzie vojskaŭ terytaryjalnaj abarony, byli znajomy z kankretnymi ludźmi, i nie tolki ź liku kamandziraŭ. Akramia taho, kiraŭnik dziaržavy daručyŭ, kab byŭ sfarmiravany zapas uzbrajeńniaŭ i inšych materyjalnych resursaŭ dla vojskaŭ terytaryjalnaj abarony. «My pavinny ŭsio heta adpracavać, kab hubiernatar viedaŭ takuju temu hetak ža, jak jon viedaje technałohiju, naprykład, pasiaŭnoj kampanii», - skazaŭ Alaksandr Łukašenka. Jon dadaŭ, što heta datyčycca i staršyń har- i rajvykankamaŭ. Jak padkreśliŭ jon, tych ź ich, chto nie vałodaje hetym pytańniem, nieabchodna navučyć, a astatnim stvaryć umovy, kab abnavić ich viedy, prajšoŭšysia takim čynam pa ŭsioj viertykali miascovaj ułady.
