Pry kancy 90-ch X-files mieli šalonuju papularnaść. Apantany ahient FBR Foks Małder i jahonaja pryhažunia-naparnica Dana Skali traplali ŭ samyja niezvyčajnyja pryhody. Jany rasśledavali spravy čupakabry, džersijskaha djabła, vampiry i mańjaki prosta nie paddavalisia ličeńniu. I ŭsio heta było smačna prypierčana temaj NŁA, a taksama zmovy dziaržaŭnych orhanaŭ, jakija daŭno ŭstupili ŭ kantakt ź inšapłanietnikami, ale chavajuć heta ad ludziej.
Małder byŭ čałaviekam, jaki išoŭ suprać sistemy, biŭsia ŭ nieparušny mur. Piersanaž, jaki nie moža nie vyklikać davieru i supieražyvańnia.
Praz 15 hadoŭ my bačym zusim inšaha Małdera — stomlenaha i nie adkrytaha dla viery ŭ niezvyčajnaje. Pa pieršaj sieryi dyk uvohule składvajecca ŭražańnie, što akcior Devid Duchoŭny tak i nie vyjšaŭ z roli Chenka Mudzi (pažavanaha piśmieńnika-płejboja) z «Pamaŭźlivaj Kalifornii», a jaho prymusili hrać Małdera.
Ahient FBR navat ź niejkaj pabłažlivaściu stavicca da svajoj papiaredniaj dziejnaści. Jon z razdražnieńniem kidaje ałoŭki ŭ płakat «Ja chaču vieryć» z vyjavaj latalnaj talerki. «Usio nievytłumačalnaje ŭžo patłumačyli», — kaža hieroj, ale ad jaho chočacca čuć zusim inšaje. Nie dziela hetaha miljony ludziej načami hladzieli «Sakretnyja materyjały». I choć urešcie Małder sutykajecca ź niaźviedanym, ale składvajecca takoje ŭražańnie, što heta jaho mała kranaje — niejkaje prafiesijnaje vyharańnie. Takoje ŭražańnie, što halucynahiennyja hryby jaho bolš cikaviać usio ž dziela taho, kab złavić kajf, a nie raskryć spravu.
Novyja X-files cytujuć Abamu i Trampa. Jany mocna pryviazanyja da siońniašnich dzion: hieroi zanuranyja ŭ ajfony i karystajucca huhłam. Techničnym navinkam uvohule addajecca niamała ŭvahi. Pakazana, jak «prostyja amierykancy» vierać u toje, što «AAN maje płan źniščeńnia Amieryki praz dasyłańnie im mihrantaŭ». Prablemie isłamskaha teraryzmu pryśviečanaja cełaja sieryja.
Dyj padziei ŭ dziasiatym siezonie raźvivajucca niejak praźmierna imkliva. Dzieviać siezonaŭ nie chapiła Małderu i Skali, kab razhadać uradavuju zmovu, a tut jany vyličvajuć usio za pieršyja paŭsieryi. Chacia ŭsie dobra pamiatajuć, što iścina dzieści pobač?
U piataj sieryi siezona ahient FBR u pieraliku krain, adkul prychodziać tryvožnyja viestki, zhadvaje Biełaruś. Choć adna nahoda dla maleńkaj radaści: Małder i Skali dumajuć pra Biełaruś.
