10 videaŭrokaŭ ad majstra i dudara hurta «PAWA» Jurasia Pankieviča źjavilisia ŭ volnym dostupie ŭ siecivie.
Kulturnickaja placoŭka «Art Siadziba», Anton Sietkin, krama Symbal.by i hramadskaja kulturnickaja kampanija «Budźma biełarusami!» pradstaŭlajuć 10 biaspłatnych videaŭrokaŭ ad viadomaha biełaruskaha majstra i dudara Jurasia Pankieviča. U ich Juraś vizualna i na prykładach pakazvaje praces navučańnia ihry na biełaruskaj dudzie.
«Kaliści ja pačynaŭ z taho, što vučyŭsia rabić dudu ŭ majstra Todara Kaškureviča, — raspaviadaje Juraś, jaki hraje na dudzie voś užo 13 hadoŭ. — Kali my skončyli, Todar pakazaŭ mnie prosta ŭ majsterni, što i jak ciapier ź joj rabić. Ale ŭžo doma ad radaści i chvalavańnia ja nie moh uspomnić aničoha z taho, što jon mnie pakazaŭ! Voś tady taki materyjał byŭ by mnie vielmi darečy. Tamu ja liču, što našyja «Videaŭroki» — heta karysny dapamožnik dla pačatkoŭcaŭ!»
Jak vybrać i nastroić dudu? Jak uziać pieršuju notu, vyvučyć miełodyju? Jak upisać dudu ŭ hurt i padstroić padčas kancertaŭ? I navat jak vyrabić trość dla žalejki i burdona! Hladzicie 10 urokaŭ i znachodźcie adkazy na ŭsie hetyja pytańni.
Zdymkami videaŭrokaŭ zajmałasia kamanda «Art Siadziby». Źmicier Afanasienka, jaki takim čynam prasłuchaŭ uvieś kurs dudara-pačatkoŭca, źniaŭsia ŭ bonusnym videa, dzie pasprabavaŭ uziać svaje pieršyja noty na dudzie (maleńki spojler — u jaho atrymałasia!).
Płan zaniatkaŭ taki:
1. Vybar dudy
Biełaruskija dudy. Vybar pamiž adnaburdonnaj (lepielskaj) dudoj i dudoj maciankaj (trochburdonnaj).
2. Nastrojka dudy
Nastrojka žalejki. Nastrojka hukaŭ (burdonaŭ). Padstrojka trości huka j karekcyja tonu huku (burdona).
3. Pačatkovy zaniatak
Pastanoŭka dudara. Trymańnie dudy. Pravierka miaška dudy. Jak nadźmuć miech? Jak trymać cisk pavietra u miechu. Biarem pieršuju notu na dudzie.
4. Kvarty, kvinty j chvala na žalejcy
Na pačatkovym uzroŭni rekamiendujecca vučycca hrać na dudzie biez burdona. Praktykavańni dla treniroŭki j razyhryvańnia palcaŭ ruk.
5. Pieršaja miełodyja na dudzie
Razvučvajem prostuju miełodyju na žalejcy. Miełodyja «Ciacierka». Jak pačać hrać miełodyju? Jak trymać cisk? Jak trymać rytm?
6. Hrajem na dudzie z hukam
Padklučajem da dudy burdon. Vučymsia trymać cisk. Pačynajem miełodyju z najhryšu. Razyhryvajem miełodyju «Zajhraj ža mnie, dudaročku». Vučymsia hrać u adnym rytmie.
7. Jak razyhrać miełodyju u dudarskaj maniery i impravizacyi na dudzie
8. Vykarystańnie dudy u hurtach
Upisańnie dudy ŭ hurt. Składanaści vykarystańnia. Padstrojka dudy padčas kancertaŭ. Sceničnaja pastanoŭka dudara.
9. Robim trość dla žalejki
Vyrab i nastrojka trości dla žalejki.
10. Robim trość dla burdona.
Vyrab i nastrojka trości dla burdona.