Indyvidualnyja pradprymalniki pavinny admovicca ad vypłaty padatkaŭ, pakul ułady nie admieniać ukaz № 222 ab rehulavańni pradprymalnickaj dziejnaści i realizacyi tavaraŭ. Pra heta zajaviŭ aktyvist pradprymalnickaha ruchu, namieśnik staršyni ruchu salidarnaści «Razam» Aleś Makajeŭ 24 lutaha na pres-kanfierencyi ŭ Minsku.
Pavodle jaho słoŭ, heta vymušanaja miera ŭ adkaz na dziejańni ŭładaŭ, jakija pazbaŭlajuć IP mahčymaści pracavać. «Heta prava ludziej — pratestavać, kali ŭłady parušajuć ich pravy», — padkreśliŭ Makajeŭ.
Jon zaklikaŭ pradprymalnikaŭ pryjści na Kastryčnickuju płošču Minska 28 lutaha, kab u čarhovy raz vykazać pratest. «Zaprašaju na mitynh nie tolki pradprymalnikaŭ, ale i ŭsich hramadzian Biełarusi. My pavinny być salidarnyja», — skazaŭ jon.
Były palitviazień, pradprymalnik z Vaŭkavyska Mikałaj Aŭtuchovič adznačyŭ, što «ŭ ciažkaj ekanamičnaj situacyi ŭłada, zdavałasia b, pavinna padtrymlivać biźnies, jaki zabiaśpiečvaje ludziam mahčymaść zarablać na žyćcio, ale jana robić naadvarot». Na jaho dumku, ułada ŭ intaresach bujnoha biźniesu pastaviła metu «źniščyć indyvidualnych pradprymalnikaŭ jak kłas».
Aŭtuchovič zajaviŭ, što «nie vielmi pravilna dziejničaŭ» staršynia RHA «Pierśpiektyva» Anatol Šumčanka, «jaki ličyć, što treba stanavicca na kaleni, pisać papiery ŭładam». «Chaču źviarnucca da pradprymalnikaŭ, jakija ličać, što prablemy možna vyrašyć, napisaŭšy list uradu. Nie treba być takimi naiŭnymi. Usio vyrašaje adzin čałaviek», — skazaŭ Aŭtuchovič.
U toj ža čas Makajeŭ zajaviŭ, što budzie vitać praviadzieńnie dazvolenaj akcyi, zajaŭku na praviadzieńnie jakoj Šumčanka padaŭ razam z eks-palitviaźniem Mikałajem Statkievičam. «My padtrymlivajem usie akcyi. Ale 28 lutaha pradprymalniki vyjduć na Kastryčnickuju płošču. Kali Łukašenka nie zrazumieje, što pradprymalnikaŭ nie treba ŭciskać, to ŭ jaho buduć vialikija prablemy», — skazaŭ jon.
