Nastajaciel maskoŭskaha pravasłaŭnaha chrama Archimandryt Miełchisedek (Pavieł Arciuchin) raspavioŭ pastvie, što papa Francišak choča i «viarnucca va ŭłońnie śviatoj pravasłaŭnaj carkvy i prynieści pakajańnie za toje, što nie zachavaŭ čyściniu pravasłaŭja i žyćcio pa pravasłaŭnaj viery na Zachadzie». Pa słovach śviatara, «pra heta prajšli dobryja čutki».
Videa z propaviedździu nastajaciela Chrama Praśviatoj Baharodzicy ŭ Jasienievie apublikavała internet-vydańnie «Ostrov». Śviatar raspaviadaje parafijanam pra toje, što na Zachadzie byli lehalizavanyja eŭtanazija, adnapołyja šluby i hiej-parady. «Na Zachadzie była lehalizavanaja ŭ svoj čas eŭtanazija, heta značyć miedyčnaje zabojstva čałavieka, — kali jon choča syści z žyćcia z dapamohaj lekaraŭ. Byli lehalizavanyja adnapołyja šluby, byli lehalizavanyja hiej-parady, začyniajucca chramy i cerkvy ŭ Jeŭropie, a ŭ krainach pravasłaŭja i asabliva ŭ Rasii chramy, naadvarot, adkryvajucca ŭ biaskoncaj kolkaści», — zajaviŭ jon.
Na dumku Miełchisedeka, znakam taho, što papa źbirajecca pryniać pravasłaŭje, źjaŭlajecca toje, što padčas sustrečy papy i Patryjarcha Kiryła ŭ aeraporcie Havany «u aeraporcie, zzadu (na ścianie) było nie katalickaje raśpiaćcie, skulpturnaje, raźbianoje, abo z kamienia, a było naša, staražytnaje raśpiaćcie XVII stahodździa».
Archimandryt Miełchisedek taksama źjaŭlajecca pres-sakratarom Sinadalnaha adździeła pa manastyrach i manastvie RPC.
Były staršynia Sinadalnaha adździeła pa ŭzajemaadnosinach Carkvy i hramadstva RPC Usievaład Čaplin vykazaŭ mierkavańnie, što nastajaciel sprabavaŭ takim čynam supakoić pastvu, jakaja vykazvaje zakłapočanaść i zaniepakojenaść sustrečaj patryjarcha i papy. Pa słovach Čaplina, dla mnohich pravasłaŭnych chryścijan, praŭdzivaj carkvoj moža być tolki pravasłaŭnaja carkva, a dźviuch cerkvaŭ — Pravasłaŭnaj i Katalickaj — być nie moža.
«Ludzi ličać, što siońnia zachoŭvajuć aktualnaść słovy staražytnych śviatych, jakija nazyvali katalictva jeraśsiu. Dla mnohich ludziej hetyja słovy — takaja ž norma viery, jak i śviatoje pisańnie», — rastłumačyŭ Čaplin. Jon upeŭnieny, što praktyčna pałova pravasłaŭnych chryścijan staviacca krytyčna da minułaj sustrečy papy i patryjarcha.
Sakratar Kanfierencyi Katalickich Biskupaŭ Rasii monsińjor Ihar Kavaleŭski admoviŭsia kamientavać vystup Miełchisedeka, zajaviŭšy, što nie moža kamientavać asobnyja dumki pravasłaŭnych śviataroŭ.
Ad kamientaroŭ admovilisia i ŭ Sinadalnym adździele pa ŭzajemaadnosinach Carkvy z hramadstvam i ŚMI. Kiraŭnik infarmacyjna-analityčnaha ŭpraŭleńnia adździeła Vachtanh Kipšydze zajaviŭ: «Čutki nie kamientujem».
