Minski abłasny sud prysudziŭ eks-staršyniu Uździenskaha rajvykankama Viačasłava Pacholčyka da siami hadoŭ pazbaŭleńnia voli.
«Pacholčyka pryznać vinavatym u atrymańni chabaru pa č.3 art.430 KK i prysudzić da siami hadoŭ pazbaŭleńnia voli z kanfiskacyjaj usioj majomaści», — vyrašyŭ sud.
Taksama ŭ pryhavory skazana, što Viačasłaŭ Pacholčyk pazbaŭlajecca na piać hadoŭ prava zajmać pasady, źviazanyja z arhanizacyjna-rasparadčymi i administracyjna-haspadarčymi funkcyjami. Ź jaho budzie spahnana zvyš za 58 młn rubloŭ niezakonna atrymanaj vyhady i bolš za 2 młn dziaržpošliny.
Inšy abvinavačany — eks-dyrektar AAT «Uździenski rajahraservis» Alaksandr Bič — pryznany vinavatym pa č.3 art.430. Jaho prysudzili da šaści hadoŭ pazbaŭleńnia voli z kanfiskacyjaj majomaści. Jon taksama pazbaŭlajecca prava zajmać anałahičnyja pasady terminam na piać hadoŭ. Ź jaho budzie spahnanaja dziaržpošlina i bolš za 32 młn rubloŭ niezakonna atrymanaj vyhady.
Pa spravie prachodzili jašče dva čałavieki, jakich abvinavacili ŭ dačy chabaru Viačasłavu Pacholčyku i Alaksandru Biču. Adzin ź ich — Uładzimir Štrajchiert — pryznany vinavatym pa č.2 art.295 KK (niezakonnaje zachoŭvańnie patronaŭ) i pa č.2 art.431 KK (dača chabaru). Pryznačana pakarańnie — try hady pazbaŭleńnia voli. Abvinavačany ŭ dačy chabaru Pavieł Valukievič taksama pryznany vinavatym pa č.2 art.431, jamu pryznačana dva hady pazbaŭleńnia voli.
Jak paviedamlałasia, sudovy praces pačaŭsia 28 studzienia 2016 hoda. Pravaachoŭniki zatrymali fihurantaŭ spravy ŭ sakaviku 2015 hoda ŭ momant atrymańnia chabaru ŭ pamiery 8 tysiač jeŭra ad pradstaŭnikoŭ viadomaha zamiežnaha vytvorcy sielskahaspadarčaj techniki.
