1 sakavika rašeńniem sudovaj kalehii pa kryminalnych spravach Viarchoŭnaha suda Biełarusi ŭ apielacyjnaj instancyi źmienieny prysud Mienskaha abłsuda ad 29 śniežnia 2015 hoda ŭ dačynieńni da byłoha načalnika Ašmianskaj mytni Ivana Niviarkieviča.
fota abw.by
Jak paviedamlaje pres-słužba Viarchoŭnaha suda, pa prysudzie suda pieršaj instancyi čynoŭnik byŭ pryznany vinavatym u atrymańnie chabaru, paŭtorna ŭ asabliva bujnym pamiery, asobaj, jakaja zajmaje adkaznuju pasadu.
Minski abłasny sud pryznačyŭ abvinavačanamu pakarańnie na padstavie č. 3 art. 430 KK z užyvańniem art. 60 KK u vyhladzie pazbaŭleńnia voli terminam na siem hadoŭ z kanfiskacyjaj usioj majomaści, z pazbaŭleńniem prava zajmać pasady, źviazanyja z vykanańniem arhanizacyjna-rasparadčych i administracyjna-haspadarčych abaviazkaŭ terminam na piać hadoŭ, z pazbaŭleńniem śpiecyjalnaha zvańnia dziaržaŭnaha savietnika mytnaj słužby 3-ha ranhu, z adbyvańniem pakarańnia ŭ papraŭčaj kałonii va ŭmovach ŭzmocnienaha režymu.
Było pastanoŭlena spahnać z abvinavačanaha ŭ dachod dziaržavy nieabhruntavanyja ŭzbahačeńni ŭ pamiery 238,4 miljona rubloŭ i dziaržpošlinu ŭ pamiery 11,9 miljona rubloŭ.
Viarchoŭny sud 1-sakavika vyklučyŭ z prysudu abłsuda ŭkazańni ab spahnańni z abvinavačanaha ŭ dachod dziaržavy nieabhruntavanych uzbahačeńniaŭ i dziaržpošliny i pra viartańnie hrašovych srodkaŭ, jakija znachodziacca na kart-rachunkach u niekalkich bankach, u košt kampiensacyi nieabhruntavanaha ŭzbahačeńnia. Pavodle infarmacyi VS, da času vyniasieńnia prysudu ŭsia suma dachodu, atrymanaha abvinavačanym złačynnym šlacham, u dobraachvotnym paradku była vypłačanaja. Adnak sud pieršaj instancyi dadzienym akaličnaściam raniej acenki nie daŭ.
Sudom apielacyjnaj instancyi Viarchoŭnaha suda poŭnaja vypłata dachodu, atrymanaha złačynnym šlacham, pryznanaja akaličnaściu, jakaja źmiakčaje adkaznaść abvinavačanaha, z pryčyny čaho panižany termin pryznačanaha asnoŭnaha pakarańnia ŭ vyhladzie pazbaŭleńnia voli da šaści hadoŭ.
U astatnim prysud pakinuty bieź źmieny, a kasacyjny pratest — biez zadavalnieńnia, adznačaje BiełaPAN.
