 |
«Ja — zvyčajny siaredni student»
«Naša Niva»: Michaił, hetyja tydni ŭ ciabie vydalisia dosyć napružanymi. Što ciapier bolej chvaluje: vyklučeńnie z BDU ci kryminalny sud?
Michaił Paškievič: Moža, heta i budzie niečakanym, ale ni adnu, ni druhuju padzieju nie liču na siońnia samym važnym u žyćci. Bolš važnyja — arhanizacyjnaja praca ŭ AHP i «Maładych demakratach». Vidavočna, što kryminalnaja sprava skončycca štrafam [Hutarka adbyłasia za niekalki dzion da pačatku pracesu -- NN]. Kab nas chacieli pasadzić u turmu, daŭno b heta zrabili. Što da vyklučeńnia, to nia pieršy raz heta ŭžo pieražyvaju. Maralnaja pieramoha ŭsio adno za mnoj, bo baču, jak namieśniki dekana, supracoŭniki fakultetu mianie padtrymlivajuć. Źbirajusia źviartacca ŭ sud. U nas jość stereatyp, kali studenta‑apazycyjanera adličvajuć, to jon albo vydatnik, jak Juraś Alejnik, albo «dvoječnik» i prykryvaŭsia palitykaj. Ja — zvyčajny siaredni student.
«NN»: Možaš padrabiaźniej raskazać pra akaličnaści adličeńnia?
MP: Jašče letam mianie vyklučyli z VNU za ŭdzieł u vybarach u Mienski haradzki saviet, za toje samaje z histfaku adličyli i siabra Partyi BNF Andrusia Ihnatoviča. Ja zmoh uznavicca na zavočnym adździaleńni, na 6‑m kursie, z treciaj ci čaćviertaj sproby. Zdaŭ amal usie akademičnyja zapazyčanaści. Ale praz peŭny čas znoŭ pačalisia prablemy. Mianie stali vyklikać u dekanat, papiaredžvali, kab nie vychodziŭ na vulicy 25 Sakavika, uspaminali, što suprać mianie zaviedzienaja kryminalnaja sprava. Ja zdaŭ ekzamen pa metadalohii historyi, ale vyśvietliłasia, što vykładčyk nia moh jaho prymać. Ale što ja musiŭ rabić? Prasić u vykładčyka, kab mnie pakazaŭ licenziju, ci mahu ja jamu zdavać ekzamen?
«NN»: Praciahvać navučańnie za miažoj nia chočaš?
MP: Nie. Jašče letaś, paśla adličeńnia z BDU, prapanoŭvali źjechać pa prahramie Kalinoŭskaha. Navat pastupiŭ u Eŭrapiejski humanitarny ŭnversytet na fakultet palitalohii, ale praz dva tydni sam napisaŭ zajavu ab adličeńni. Mnie nie padabałasia palityka EHU, jany sprabujuć trymacca pa‑za palitykaj, ale ja nie mahu žyć pa‑za palitykaj. Ja cudoŭna razumieju, što ŭ EHU sprabujuć stvaryć niejki akademičny asiarodak, ale heta nie dla mianie. Jašče jość varyjant, kali partnery partyi za miažoj dapamohuć abaranić dyplom u adnoj z krain Eŭropy.
«Baćka pieravodzić biznes va Ŭkrainu»
«NN»: Jakija čakańni adnosna sudu?
MP: Jašče ŭ studzieni na Akreścina vielmi niepryjemna było daviedacca, što za kratami apynuŭsia Andrej Kim, i na jaho zaviedzienaja kryminałka.
10 studzienia ŭžo paśla razhonu my razam z Andrejem kročyli ŭ bok Kastryčnickaj płoščy. Jon jašče śmiajaŭsia: «Davaj vyviezu ciabie kudy dalej, kab schavać». Paśla Kima abvinavacili ŭ źbićci supracoŭnika DAI. Što da nas, to nia dumaju, što budzie niejki surjozny prysud.«NN»: 10 studzienia dumaŭ, što suprać ciabie zaviaduć kryminalnuju spravu?
MP: Za dzień da akcyi ja čytaŭ na radyjo «Svaboda» onłajn z Anatolem Šumčankam, u jakoha zapytalisia, ci nie nadyšoŭ čas pierakryvać praspekty. Jon adkazaŭ, što za heta praduhledžanaja kryminalnaja adkaznaść. Litaralna na nastupny dzień, kali my pierakryli praspekt, ja ŭspomniŭ hetyja słovy. Na sutkach ja taksama siadzieŭ razam z Šumčankam. Jon pastajanna kazaŭ: «Suprać vas, chłopcy, zaviaduć kryminalnyja spravy. Ja stajaŭ ubaku, nie vychodziŭ na prajeznuju častku, a voś vy stajali na darozie. Uličvajcie heta».
«NN»: Čamu lider pradprymalnikaŭ Šumčanka zastaŭsia zboku, a vy ŭsio ž pajšli na takija radykalnyja dziejańni 10 studzienia?
MP: Moj baćka sam pradprymalnik z maleńkaha biełaruskaha horadu Biarozy. U 1992—93 hadach ja na ŭłasnyja vočy bačyŭ, jak jon pačynaŭ svaju spravu. Ja dobra pamiataju, jak pradprymalnikaŭ pačali nazyvać «vašyvymi błochami». Nie mahu skazać, što moj baćka, doktar pavodle adukacyi, zarehistravaŭsia ŭ IP ad dobraha žyćcia. Što da Šumčanki, to ničoha kiepskaha kazać pra jaho ja nia budu, chacia i asoba heta dosyć sprečnaja. Hety čałaviek, biezumoŭna, maje svoj punkt hledžańnia. Jon nie pracuje na režym, jak dumajuć mnohija. U hetym mianie pierakanali sutki, praviedzienyja razam na Akreścina.
«NN»: Baćka i siońnia pracuje pradprymalnikam?
MP: Na siońniašni momant jon zakryvaje svaju spravu ŭ Biełarusi i pieravodzić biznes va Ŭkrainu. Siońnia baćka kaho moža ŭziać na pracu? Mianie, jaki pražyvaje ŭ Miensku, ci nastaŭnicu‑siastru, ci jašče adnaho niepaŭnaletniaha syna. Ale, prabačcie, jamu ŭ pieršuju čarhu patrebnyja kiroŭcy vialikahruznych aŭtamabilaŭ i hruzčyki z pradaŭcami. Mnie jaho škada, bo ŭ čałavieka pałamany los. Jon aryjentavaŭsia na zusim inšaje, ale ŭ 1993 hodzie jamu skazali, što daktary‑mižnarodniki dziaržavie nia vielmi patrebnyja, tady jamu i daviałosia mianiać usio žyćcio. Bolš za toje, u novaj spravie jon taksama dabiŭsia pośpiechu. Ciapier jamu 47 hadoŭ, čatyry apošnija ź ich jamu nie dazvalajuć adkryć svaju apteku. A jak varyjant prapanoŭvajuć uznačalić biarozaŭskaje adździaleńnie «Biełaj Rusi», ale jon, naturalna, admaŭlajecca.
«Maja zadača stvaryć liberalnuju moładzievuju arhanizacyju»
«NN»: Ty kažaš, što hałoŭnaje siońnia dla ciabie arhanizacyjnaja praca ŭ AHP? Što ty maješ na ŭvazie?
MP: Dla luboj palityčnaj partyi važnaja moładzievaja arhanizacyja. U 2006‑m, kali ja pryjšoŭ u AHP, u partyi moładzievaj arhanizacyi nie było. Kali aryštavali Dzianisa Dzianisava, to pytańnie moładzievaj frakcyi AHP abvastryłasia jašče bolej, bo patrebna była siła, jakaja kaardynavała b svaju dziejnaść, a taksama vystupała ŭ abaronu viaźnia.
Z bolš stałych siabroŭ partyi vychodzić na płoščy z partretami palitviaźniaŭ mohuć tolki Labiedźka, Dabravolski, Palevikova, ale daloka nia ŭsia palitrada. Maja zadača — stvaryć liberalnuju moładzievuju arhanizacyju, jakaja b sumiaščała i zadačy demakratyzacyi hramadztva, i bolš ščylnuju pracu z moładździu. «Maładyja demakraty» siońnia — heta placoŭka, dzie farmujucca budučyja lidery partyi. Mnohija kažuć, ci nie zanadta my maładyja. Ale pahladzim na rečy. Hordan Braŭn u 17 hadoŭ staŭ ahitataram Lejbarysckaj partyi, toje samaje Toni Błer. Arhanizacyjny momant jašče važny tym, što ŭ biełaruskaj apazycyi pastajannyja prablemy z menedžmentam. U nas mnohija kryčać: «Ja — menedžar». Ja nia menedžar, ale chaču im stać. Vielmi niestaje narmalnaha menedžmentu dla arhanizacyi rehijanalnych struktur, palityčnych kampanij. Navat ciapier, nabližajecca «Čarnobylski šlach», ale nijakaj jasnaści ŭsio jašče niama nakont akcyi. U «Maładych demakrataŭ» jość chłopiec Aleś Sierhijenka, jaki zajmajecca techničnymi momantami. Choć jon vypadaje z uvahi presy, ale jahonaja praca nia mienš važnaja, čym, jak kažuć na «našaniŭskim» forumie, maje «ahepešnyja vychadki».«Naša baza — Mienski bujnyja harady»
«NN»: Čamu AHP?
MP: Ja pryjšoŭ u AHP u 2006 hodzie, napisaŭ zajavu na ŭstupleńnie ŭ partyju, u toj ža dzień mianie pryniali. Heta było paśla padziejaŭ na Płoščy. Chacia ja doŭha vahaŭsia i vybiraŭ miž roznymi palityčnymi strukturami. Mnie padajecca, što krainie patrebnyja nie charyzmatyčnyja lidery, a ludzi, jakija realna zdolnyja rabić svaju spravu, u AHP ja baču takich ludziej. Jany pracujuć menedžarami i top‑menedžarami niekatorych drobnych karparacyj, pryvatnymi pradprymalnikami, niekatoryja vałodajuć sami ŭnitarnymi pradpryjemstvami. Mahu nazvać chacia b Paŭła Danejku, na takich ludziej i treba aryjentavać moładź. Paśla pieramohi jak mnie tłumačyć vybarcam, čamu ja biez vyšejšaj adukacyi, ich nie chvaluje, što mianie adličyli za palityčnyja pohlady. Niekali ja syšoŭ z «Maładoha frontu» jašče i tamu, što niemahčyma być uvieś čas maładym, jak jany prapanujuć. Zrešty, ja tak i nie adkazaŭ, čamu ja vybraŭ AHP. Napeŭna, prosta źbieh abstavin.
«NN»: Ty sam pačaŭ temu. Ujavim, što ŭ krainie prachodziać demakratyčnyja vybary. Kolki pracentaŭ hałasoŭ vybarcaŭ moža nabrać AHP?
MP: U 1995 hodzie padčas apošnich demakratyčnych vybaraŭ u krainie praktyčna va ŭsich mienskich akruhach miescy ŭ Viarchoŭnym Saviecie ŭziali siońniašnija siabry AHP — Labiedźka, Dabravolski, Hraznova, Bahdankievič. Naša baza — mienavita Miensk i bujnyja harady. Pryznajusia, što ŭ rajonnych centrach padtrymka ŭ nas značna mienšaja. Dumaju, što pracentaŭ dziesiać—piatnaccać my ŭ lubym vypadku zdolnyja ŭziać.
«NN»: A sam sioleta idzieš na vybary?
MP: Ja prajhraŭ «prajmeryz» u Biarozie Jurasiu Hubareviču. Razhladajecca mahčymaść udziełu ŭ Mienskaj vobłaści, ale jość abstaviny, čamu ja nie pajdu na vybary — adsutnaść vyšejšaj adukacyi (vybarca treba pavažać) i mahčymaja sudzimaść.
«NN»: Na źjeździe AHP addasi svoj hołas Labiedźku?
MP: U Anatola Labiedźki jość tolki adna chiba: u jaho niama kankurencyi. Pry adsutnaści kankurencyi luby palityk stračvaje niejkija svaje jakaści. U Partyi BNF tut bolš pazytyŭnaja tendencyja. U nas šmat chto moža ŭznačalvać partyju, ale mała chto choča.
«Budu inicyjavać praviadzieńnie pazačarhovaha źjezdu»
«NN»: Chto takija «Maładyja demakraty»?
MP: Heta ŭžo treciaja sproba stvareńnia moładzievaj frakcyi AHP. Pieršaja była «Hramadzianski forum» Uładzimiera Navasiada, druhuju rabiŭ Aleś Karnijenka.U Miensku siońnia my majem kala 60 čałaviek siabroŭ našaj arhanizacyi. Kaniečnie, my prajhrajem takim bujnym kampanijam, jak «Džyns za svabodu» ci «Małady front», ale apiaredžvajem «Moładź BNF». Faktyčna dniom naradžeńnia našaj arhanizacyi možna ličyć 7 lutaha 2007 hodu, kali siamiora siabroŭ arhanizacyi z partretami Dz.Dzianisava vyjšli da francuskaha pasolstva. Ciapier my majem struktury ŭ Horadni, Bieraści, Mahilovie. Prablemy tolki z Homielščynaj i najbolš ź Viciebščynaj. My nia honimsia za masavaściu, bo jakaść dla nas važniejšaja.
«NN»: Jašče źbirajeśsia vyłučacca na pasadu staršyni «Maładych demakrataŭ»?
MP: Budu najbližejšym časam inicyjavać praviadzieńnie pazačarhovaha źjezdu arhanizacyi. Alaksandar Šunkievič dobra moža pradstaŭlać arhanizacyju ŭ parlamencie ci niejkim munipalitecie, ale kiravać va ŭmovach blizkich da bajavych — nie. Ja nie chavaju, što źbirajusia jašče paciahacca z Šunkievičam.
>«Padrabiŭ podpis baćki. Kab ustupić u «MF»
«NN»: Uvohule, jak ty pryjšoŭ u palityku?
MP: U 13 hadoŭ ja ŭstupiŭ u «Małady front». Išoŭ 1999 hod. Ja vielmi cikaviŭsia historyjaj, byŭ junakom, jaki pieračytaŭ usiaho Karatkieviča.
U susieda‑mastaka doma pastajanna vystupali Viktar Šałkievič, inšyja bardy. Užo ŭ hetym uzroście ja byŭ absalutna nacyjanalna sfarmavanym čałaviekam. Navat z maci, jakaja ŭ mianie rasiejka, časta ŭźnikali sprečki. Jana chacieła, kab ja byŭ takim «rasiejskim» chłopčykam, ale ja byŭ inšym. My ŭtroch stvaryli biarozaŭskuju supołku «MF», praz hod nas užo było 15 čałaviek. Jašče praz hod my pravodzim kampaniju «Vybiraj», šerah kancertaŭ. Moj stryječny brat Aleś Lucič hraje ŭ hurcie «B:N», tak što možna skazać, što heta siamiejnaje, praha da Biełaruščyny. Darečy, cikavy momant: u «MF» možna było ŭstupać tolki z 16 hadoŭ, z dazvołu baćkoŭ — z 14. Dyk ja padrabiŭ dakumenty, što mnie ŭžo jość čatyrnaccać, a taksama padrabiŭ podpis baćki.«NN»: Dyk a ty sam ličyš, što palityka dla ciabie ŭsurjoz i nadoŭha, ci tolki časovaje zachapleńnie?
MP: U mianie zaŭsiody było i zastajecca žadańnie zajmacca biznesam, ale pakul heta niemahčyma. Što da palityki, to fiška ŭ tym, što bolš nikoha niama. Kab byŭ niejki małady čałaviek u AHP, jaki b zajmaŭsia majoj spravaj lepš za mianie, to ja nasamreč byŭ by hetamu tolki rady. Adkryli b z baćkam svajo pradpryjemstva, zajmaŭsia b reklamaj, dva—try razy na tydzień prychodziŭ by na ofis AHP rabić svaju pracu, i ŭsio. Tak robić šmat chto u našaj partyi. Ale na dadzieny momant ja nia viedaju, chto b moh vykonvać maje funkcyi. Ja na samaj spravie liču, što ŭ mianie jość palityčny patencyjał i treba jaho raźvivać.
***
Michaił Paškievič naradziŭsia 20 lutaha 1986 h. u Respublicy Komi (Rasiejskaja Federacyja). Z 1999 h. siabar «Maładoha frontu». Z 2006 h. u AHP. Vosieńniu 2007 h. abrany namieśnikam staršyni arhanizacyi «Maładyja demakraty». Fihurant kryminalnaj spravy za mitynh pradprymalnikaŭ 10 studzienia.
