Pradstaŭnik dziaržabvinavačańnia 2 sakavika zaprasiła 12 hadoŭ źniavoleńnia ŭ kałonii ŭzmocnienaha režymu dla abvinavačanaha ŭ karupcyi byłoha dyrektara mahiloŭskaha šviejnaj ZAT «Viaśnianka» Maksima Šneka.
Nahadajem, sud Leninskaha rajona Mahilova ŭ ciapierašni čas razhladaje spravu byłoha kiraŭnika, jaki abvinavačvajecca ŭ naniasieńni škody pradpryjemstvu bolš čym na 2,5 młrd rubloŭ. Jamu inkryminavali złoŭžyvańnie ŭładaj abo słužbovym stanoviščam, šmatlikija kradziažy, vymańvańnie kredytu i słužbovy padłoh. Šnek pryznaŭ siabie vinavatym u słužbovym padłohu, tłumačačy «prycharošvańnie» statystyčnych dadzienych žadańniem zachavać pradpryjemstva.
Padčas pasiadžeńnia 2 sakavika było skončana sudovaje śledstva. Pierad hetym sudździa abviaściŭ infarmacyju, jakaja pastupiła ad rasiejskaj kampanii «Tera trejd», ab pieraličeńni na rachunak «Viaśnianki» 1 młn rasijskich rubloŭ. U svaju čarhu, prakuror pradstaviła dadzienyja ab adsutnaści hetych srodkaŭ na rachunku mahiloŭskaha pradpryjemstva. Abodva paviedamleńni dałučany da spravy. Da spravy taksama była dałučana zajava Šneka na imia dyrektara pradpryjemstva ab vyličeńni z zarobku 2 młn 400 tys. rubloŭ, jakija padsudny byŭ vinien fabrycy za pašyŭ adzieńnia.
Paśla hetaha sud pierajšoŭ da sprečak, i dziaržabvinavaŭca zajaviła, što vina Šneka dakazanaja pa ŭsich artykułach, niahledziačy na toje što pa bolšaści ź ich padsudny ličyć siabie nievinavatym. Ździajśnieńnie słužbovaj padrobki, vinu ŭ čym Šnek pryznaje, prakuror patłumačyła nie žadańniem kiraŭnika zachavać pradpryjemstva, a žadańniem zabiaśpiečyć sabie kamfortnyja ŭmovy znachodžańnia na pasadzie.
Dziaržabvinavaŭca taksama zajaviła, što kampanija «Tera trejd» nikoli nie mieła damoŭnych abaviazacielstvaŭ z ZAT «Viaśnianka» i paŭhadavyja sproby pieraličyć hrošy niezrazumiełyja. «Lepš by siamja Šneka kampiensavała b hetym adnym miljonam rasijskich rubloŭ škodu, naniesienuju pradpryjemstvu», — skazała jana.
Prakuror zapatrabavała prysudzić padsudnaha da 12 hadoŭ źniavoleńnia ŭ kałonii ŭzmocnienaha režymu z kanfiskacyjaj majomaści i zabaronaj na zajmańnie peŭnych pasad na piać hadoŭ.
U svaju čarhu, hramadzianski pazoŭnik, jakim vystupiła ŭpaŭnavažany pradstaŭnik ZAT «Viaśnianka», zapatrabavała spahnać sa Šneka 2 młrd 517 młn 610 tys. rubloŭ škody. Ad pazovu ŭ 2 młn 400 tys. rubloŭ pradpryjemstva admoviłasia.
Sud razhladaje dziejnaść Šneka z krasavika 2012-ha pa listapad 2014 hoda, heta značyć u pieryjad, kali jon pracavaŭ na pradpryjemstvie, u tym liku dyrektaram (z krasavika 2014 hoda). Užo bolš za hod były dyrektar znachodzicca pad vartaj, adnak «Viaśnianka» ŭsio jašče ličycca siarod prablemnych pradpryjemstvaŭ. Tym nie mienš za 15 śniežnia 2015 hoda pazačarhovy schod akcyjanieraŭ pryniaŭ rašeńnie nie adkryvać praceduru bankructva.
«Viaśnianka» — byłaja šviejnaja fabryka im. Vaładarskaha, zasnavana 1 lipienia 1929 hoda. Uvachodzić u skład kancerna «Biellehpram» i źjaŭlajecca adnym z najbujniejšych subjektaŭ haspadarańnia pa vypusku šviejnych vyrabaŭ u Biełarusi i krainach SND.
