Mienskija ŭłady admovili Anatolu Šumčanku i Mikałaju Statkieviču ŭ praviadzieńni 14 sakavika mitynhu i šeścia pradprymalnikaŭ na nastupny dzień paśla padačy zajaŭki na akcyju Anatolem Labiedźkam.
Pra heta paviedamiła respublikanskaje abjadnańnie «Perspektyva».
U adkazie, jaki dasłaŭ Mienharvykankam Šumčanku i Statkieviču, havorycca, što ŭ Mienharvykankam «pastupili zajavy inšych asobaŭ ab praviadzieńni masavaha mierapryjemstva ŭ formie šeścia pa analahičnym maršrucie 14 sakavika».
«U adpaviednaści z artykułam 9 zakonu, jakim zabaraniajecca praviadzieńnie adnačasova niekalkich masavych mierapryjemstvaŭ u adnym miescy ci pa adnym maršrucie ruchu, Mienski harvykankam nia moža dać dazvoł na praviadzieńnie 14 sakavika masavych mierapryjemstvaŭ — šeścia i mitynhu na terytoryi Miensku», — havorycca ŭ adkazie Mienharvykankamu.
Taksama mienskija ŭłady adznačajuć, što zajaŭniki parušyli zakanadaŭstva, raźmiaściŭšy na internet-sajtach infarmacyju pra datu, miesca i čas praviadzieńnia akcyi. Da taho ž miesca zboru ŭdzielnikaŭ nie adpaviadaje zakanadaŭstvu, nie paznačana i krynica finansavańnia masavych mierapryjemstvaŭ.
«Padača zajavy staršyniom Abjadnanaj hramadzianskaj partyi była zroblena naŭmysna, kab byŭ žalezny arhument admović ludziam, jakija realna siońnia ŭjaŭlajuć pahrozu dla ŭładaŭ Biełarusi. Proźviščy hetych ludziej možacie pračytać u adkazie Mienharvykankamu. Ułady banalna spałochalisia, i kali raniej jany mahli šantažavać pieramovami i inšymi pahrozami, to ciapier zrazumieli, što rabić naŭprost u łob — bieskarysna, tamu byli zadziejničany inšyja varyjanty. Jakija?! Chaj kožny sam sumlenna adkaža sabie sam. Ale, niahledziačy na heta, my nie adstupim i adkažam», — adznačyŭ Anatol Šumčanka, kamentujučy zabaronu ŭładaŭ na akcyi pratestu.
Staršynia Abjadnanaj hramadzianskaj partyi Anatol Labiedźka padaŭ u Mienharvykankam zajaŭku na praviadzieńnie maršu «Za hodnaje žyćcio» ŭ toj ža čas i ŭ tym ža miescy, dzie źbiralisia pravodzić Marš pradprymalnikaŭ Anatol Šumčanka i Mikałaj Statkievič. Labiedźka patłumačyŭ, što chacieŭ «padstrachavać» zajaŭku Šumčanki i Statkieviča na mitynh u Miensku 14 sakavika. Paźniej Labiedźka paviedamiŭ, što adklikaŭ zajaŭku na mitynh 14 sakavika.
