Čarhovaje šakujučaje złačynstva adbyłosia ŭ Homieli ŭ aŭtorak. Siarod biełaha dnia 27-hadovy mužčyna ŭvarvaŭsia ŭ čužuju kvateru, udaryŭšy nažom 4-hadovuju dziaŭčynku i jaje 55-hadovuju babulu. Pry hetym napadnik byŭ całkam hołym.
— Susiedzi bačyli mužčynu niezadoŭha da trahiedyi apranutym — jon siadzieŭ na łavačcy la padjezda. Nieŭzabavie jon zajšoŭ u padjezd i pačaŭ tuzać za ručki ŭvachodnych dźviarej. Adna z kvater akazalisia niezamknionaj. Prajšoŭšy na kuchniu, mužčyna ŭziaŭ nož i adzin raz udaryŭ dziaŭčynku, jakaja znachodziłasia ŭ kvatery, i niekalki razoŭ jaje babulu. Žančyna stała kryčać, heta pačuŭ susied, jaki jakraz byŭ u hety čas na placoŭcy. Jon zabieh u kvateru i vybiŭ nož z ruk napadnika. Inšyja susiedzi, pačuŭšy kryki, vyklikali milicyju, — raspaviała kp.by aficyjny pradstaŭnik USK pa Homielskaj vobłaści Maryja Kryvanohava.
Napadnika zatrymali, Homielski haradski adździeł SK raspačaŭ kryminalnuju spravu za zamach na zabojstva dvuch čałaviek. Ciapier śledčyja sprabujuć vyśvietlić u mužčyny matyvy złačynstva. Pavodle papiarednich dadzienych, jon byŭ ćviarozy, a voś vynikaŭ sprob na narkatyčnyja rečyvy pakul niama. Taksama pa papiaredniaj infarmacyi, napadnik raniej nie sudzimy, chałasty, pracuje na adnym z pradpryjemstvaŭ.
Tym časam i dziaŭčynka, i babula znachodziacca ŭ reanimacyi ŭ ciažkim stanie.
