Hod tamu pa inicyjatyvie MUS była stvorana rota zabieśpiačeńnia śpiecyjalnych apieracyj. Doŭhi čas infarmacyja ab joj zastavałasia tajamnicaj.
Śpiecpadraździaleńnie było stvorana pa inicyjatyvie namieśnika ministra ŭnutranych spraŭ — kamandujučaha Unutranymi vojskami hienierał-majora Juryja Karajeva «dla ŭzmacnieńnia bajazdolnaści». Rota raźmiaščajecca na bazie vajskovaj častki 3214 u staličnym rajonie Uručča.
Bajcy hetaj roty «mohuć vyjazdžać u luby rajon krainy dla pošuku niezakonnych uzbrojenych farmiravańniaŭ, baraćby z dyviersijna-raźviedvalnymi hrupami praciŭnika, pošuku ŭciekłych asudžanych, spynieńnia masavych biesparadkaŭ».
«U pieršuju čarhu źviartajem uvahu na fizičnuju padrychtoŭku i maralna-dziełavyja jakaści kandydataŭ, hutarym ź ich kamandzirami», — raskazaŭ kamandzir roty starejšy lejtenant Cimur Hryško.
U składzie śpiecroty dvuchrazovy čempijon śvietu pa K-1 Hienadź Varaksa i čempijon Jeŭropy pa fry-fajtu Dźmitryj Sobaleŭ.
U śpiecrocie na zaniatki pa bajavoj padrychtoŭcy adviedziena ŭ paŭtara raza bolš hadzin, čym u inšych padraździaleńniach, raspracavanaja admysłovaja prahrama, u asnovie jakoj — dośvied bajcoŭ atrada chutkaha reahavańnia i roty raźviedki.
Niadaŭna na adnym z palihonaŭ MNS razam z asabistym składam adpracoŭvalisia dziejańni ŭ ekstremalnych situacyjach.
«Kali ŭ inšych padraździaleńniach pravodziacca ahulnyja zaniatki dla snajpieraŭ, hranatamiotčykaŭ i kulamiotčykaŭ, to ŭ śpiecrocie dla kožnaha śpiecyjalista svoj kurs navučańnia», — dadaje namieśnik kamandzira roty pa ideałahičnaj pracy starejšy lejtenant Illa Kudryn. - <…> Asabisty skład mohuć pryciahvać padčas sumiesnych apieracyj z roznymi siłavymi strukturami dla akazańnia im ahniavoj padtrymki».
Simvałam novaj roty vybrali jastraba. «Našy kulamiotčyki i snajpiery pracujuć na dalokich dystancyjach, nie majučy blizkaha dotyku z voraham. Jastrab hetak ža, jak i my, pačynaje svajo palavańnie zdaloku i, imkliva zbližajučysia, ździŭlaje achviaru», — tłumačyć Cimur Hryško.
