Rasijskaja nacyjanalistyčnaja arhanizacyja BARS (Bałtyjski avanhard ruskaha supracivu), što bazujecca ŭ Kalininhradzie, apublikavała videazvarot da polskich nacyjanalistaŭ.
Na videa kiraŭnik arhanizacyi Alaksandr Aršulevič vystupiŭ u padtrymku ciapierašniaha palityčnaha kursa Polščy, zaklikaŭ padtrymać ciapierašni polski ŭrad, a taksama vykazaŭ polskim nacyjanalistam padtrymku ad ich ruskich bratoŭ pa idei. Aršulevič pramaŭlaje pa-polsku, ale majucca i ruskija subcitry.
«Panovie polskija nacyjanalisty! — źviartajecca Aršulevič. — Vaša šmatviekavaja baraćba za suvierenitet i nacyjanalnuju kulturu zasłuhoŭvaje vialikaj pavahi, — kaža jon. — Tolki kryvadušniki mohuć siońnia kazać pra adsutnaść demakratyi ŭ Polščy. Zaklikaju vas taksama padtrymać ciapierašni kansiervatyŭny ŭrad Polščy va ŭsich jaho dobrych pačynańniach. Siońnia, jak nikoli, ad nas, kansiervataraŭ i chryścijan, patrabujecca palityčnaje adzinstva».
Arhanizacyja BARS była ŭtvorana ŭ 2008 hodzie ŭ Kalininhradzie (darečy, sami jaje prychilniki nazyvajuć svoj horad vyklučna Kionihśbierh). Varta adznačyć, što BARS adkryta vystupaje suprać zachopnickaj palityki dziejučaha rasijskaha ŭrada i prezidenta Uładzimira Pucina. U 2014 hodzie arhanizacyja zajaviła ab svaim rašeńni supracoŭničać z pravalibieralnymi kołami dla źmieny ŭłady ŭ Rasii. Taksama siabry arhanizacyi nie pryznajuć lehitymnaść RPC, choć i źjaŭlajucca pravasłaŭnymi viernikami – jany padtrymlivajuć Ruskuju Pravasłaŭnuju Carkvu za miažoj (RPCZ). BARS supracoŭničaje z nacyjanalistyčnymi arhanizacyjami ŭ Jeŭropie i ideałahična vystupaje suprać rasijskaha šavinizmu.
