Kiraŭnik SZAT «Servaluks» Jaŭhien Baskin, zatrymany KDB 15 sakavika, siońnia pieraviedzieny pad damašni aryšt. Pra heta BiełaPAN paviedamiŭ načalnik pres-słužby Kamiteta dziaržbiaśpieki Biełarusi Dźmitryj Pabiaržyn.
Pavodle jaho słoŭ, takoje rašeńnie było pryniata «ŭ suviazi z nanoŭ adkrytymi akaličnaściami».
Pavodle infarmacyi Tut.by, Baskin kampiensavaŭ sumu naniesienaj im škody.
Jaŭhien Baskin (źleva) i Juryj Čyž. Fota: ced.by.
Nahadajem, infarmacyja pra zatrymańnie Baskina i niekalkich inšych supracoŭnikaŭ hrupy kampanij «Servaluks» źjaviłasia ŭviečary 14 sakavika. Na nastupny dzień jaje paćvierdziŭ staršynia KDB Valeryj Vakulčyk. Na bryfinhu ŭ Minsku jon paviedamiŭ, što 15 sakavika byli zatrymanyja 15 słužbovych asob kampanij «Servaluks» i «Ekamoł Ahra» (abiedźvie ŭvachodziać u hrupu «Servaluks»). Zatrymanyja padazrajucca va ŭchileńni ad vypłaty padatkaŭ u asabliva bujnym pamiery. Škoda, ustanoŭlenaja tolki za sutki śledstva, aceńvajecca ŭ 370 młrd rubloŭ, zajaviŭ Vakulčyk.
Jon taksama paviedamiŭ, što Baskin i jaho finansavy dyrektar byli zatrymanyja ŭ minskim aeraporcie pry sprobie vylecieć za miažu.
Jaŭhien Baskin uvachodzić u lik samych paśpiachovych biełaruskich biźniesmienaŭ. Stvoranaja im hrupa «Servaluks» źjaŭlajecca najbujniejšym apierataram i vytvorcam u APK, u jaje skład uvachodziać ptuškafabryki, miasa- i małakapierapracoŭčyja pradpryjemstvy, kambikormavyja zavody, małočna-tavarnaja fierma, roźničnaja sietka i inšyja padraździaleńni. Kampanija viadomaja takimi brendami, jak «Piatrucha», «Braty Hryl», «Harłačyk».
Varta adznačyć, što «Servaluks» fihuruje ŭ kryminalnaj spravie sienatara Hanny Šarejki, hiendyrektara Viciebskaj brojlernaj fabryki. Heta sprava zaraz razhladajecca ŭ Viarchoŭnym sudzie Biełarusi. Mienavita ŭ hrupu «Servaluks» uvachodzić pradpryjemstva «Ekamoł» — biełaruski kankurent zamiežnych pastaŭščykoŭ karmoŭ na fabryku.
