Hrupa kampanij «Trajpł» prypyniła ŭdzieł va ŭsich inviestycyjnych prajektach, u tym liku pa budaŭnictvie ŭ Minsku nacyjanalnaha futbolnaha stadyjona, paviedamiŭ žurnalistam 22 sakavika staršynia Biełaruskaj fiederacyi futboła, kiraŭnik Banka raźvićcia Siarhiej Rumas.
Pavodle jaho słoŭ, «Trajpł» źjaŭlajecca adnym z asnoŭnych udzielnikaŭ akcyjaniernaha tavarystva, jakoje zajmajecca pytańniami budaŭnictva areny kala dziejnaha stadyjona «Traktar». U pryvatnaści, hrupa kampanij źjaŭlajecca adkaznaj za budaŭnictva na arenie handlovaha centra.
Ciapier ź Minharvykankamam abmiarkoŭvajucca mahčymyja šlachi vychadu ź situacyi, jakaja skłałasia. Pytańni kantraktu z kitajcami, adznačyŭ Rumas, užo adpracavany, ciapier słova za biełaruskim bokam.
Ukaz prezidenta ab prajektavańni i budaŭnictvie da 31 śniežnia 2018 hoda futbolnaha stadyjona kala stadyjona «Traktar» u Minsku byŭ padpisany 18 lipienia 2014 hoda. Umiaščalnaść — 33-35 tys. hledačoŭ. Pra toje, što kitajcy vyjhrali tendar na budaŭnictva stadyjona, stała viadoma ŭ listapadzie 2015 hoda. Košt rabot nie pavinien pieravyšać 100 młn jeŭra. 11 śniežnia 2015 hoda Rumas zajaviŭ, što raźličvaje padpisać kantrakt z kitajskim bokam da kanca hoda.
