Ahułam u śviatkavańni Dnia Voli ŭ Minsku pryniali ŭdzieł bolš za tysiaču čałaviek. Było dva epicentry vuličnaj akcyi. Mikoła Statkievič, Pavieł Sieviaryniec i inšyja pryjšli da pomnika Janku Kupału, što ŭ parku nasuprać cyrku, paśla ŭskładańnia kvietak, jany prajšli šeściem da Akademii navuk. U im brała ŭdzieł kala 700 čałaviek. Było šmat ściahoŭ, a taksama kreatyŭnych płakataŭ. Častka ž ludziej pryjšła adrazu na dazvolenuju ŭładami placoŭku – kala kinateatra «Kastryčnik». A adtul prajšłasia da ŭniviersama «Ryha». Ale admovilisia iści na płošču Banhałor.
Siłaviki nijak nie zaminali ŭ praviadzieńni vuličnaj akcyi.
Sioleta ŭdzielnikam spryjała jašče nadvorje. Byŭ jasny, soniečny viasnovy viečar. Praz heta va ŭdzielnikaŭ byŭ dobry nastroj. Ludzi šmat śpiavali, asabliva chity «Lapisa Trubiackoha».
Akcyja raściahnułasia pa časie amal na try hadziny, i tamu niamnohija zdoleli ŭziać u joj udzieł ad pačatku da kanca. Ludzi prychodzili i sychodzili.
Ryhor Kastusioŭ zaklikaŭ praciahnuć śviatkavańnie doma.
19:35
Častka ludziej syšła, pryčym ludzi viartajucca pa Surhanava sa ściahami, zastałosia stajać kala 100 čałaviek.
Piśmieńnik Anatol Ivaščanka, jaki pryjšoŭ na akcyju siamjoj, kaža, što ad akcyi ŭ jaho samyja stanoŭčyja ŭražańni.
Siamja Karnielukoŭ: ad pomnika Janku Kupału pačali šeście čaćviora. Dzieci syšli kala kinateatra «Kastryčnik» na viečarovyja siekcyi, zatoje dałučyłasia stryječnaja babula.
19:30
Aficyjna akcyja skončana, ale častka ŭdzielnikaŭ zastajecca na miescy.
Alaksandr Milinkievič u kamientary NN vykazvaje mierkavańnie, što siońnia śviata było viesialejšym, čym u raniejšyja hady. «Było ŭračyściej», — kaža jon.
19:28
Ludzi nie chočuć razychodzicca. Siŭčyk prosić razyścisia.
19:24
Kałona dajšła da «Ryhi». Viačasłaŭ Siŭčyk zaklikaje ludziej razychodzicca, jon dziakuje ludziam za ŭdzieł u akcyi i prosić razychodzicca.
Pavieł Sieviaryniec vykazvaje nadzieju, što na «Čarnobylski šlach» pryjdzie bolš narodu.
Moładź masava skača na adnym miescy: «Chto nie skača, toj maskal».
19:18
Kałona idzie pa vulicy Surhanava la centra «NŁO». Śpiavajuć pieśni.
Ludzi pačynajuć krychu pakidać šeście.
A asoby ŭ cyvilnym praciahvajuć błakavać banier «Maja chata z kraju».
19:15
Častka ŭdzielnikaŭ akcyi pierachodzić vulicu Jakuba Kołasa.
19:11
Kałona dajšła da vulicy Jakuba Kołasa. Śpiavajuć «Voiny śviatła» «Lapisaŭ». Śpiavajuć «Try čarapachi».
Zdajecca, što šeście pa praśpiekcie było bolš viesialejšym.
Fota Arcioma Šrajbmana, Tut.by
19:04
Prachožyja pa-roznamu reahujuć na ŭdzielnikaŭ šeścia. Niechta ŭchvalna vitaje, niechta chucieńka prachodzić mima.
Adzin z udzielnikaŭ akcyi pryjšoŭ sa ściaham i niamieckim aŭčarkam. U jaho ŭ rukach płakat «Nie truchaj ROVD».
19:00
Napieradzie kałony, što dajšła da vulicy Surhanava, z palitykaŭ iduć Alaksiej Janukievič i Vital Rymašeŭski. Idzie Alaksandr Milinkievič.
Ludzi płanujuć dajści da supiermarkieta «Ryha» i razyścisia. Śpiavajuć pieśni «Lapisaŭ».
18:54
Kałona znoŭ pačała ruch. Ludzi skandujuć «Žyvie Biełaruś», śpiavajuć pieśni «Lapisaŭ».
Fota Tut.by
18:52
Udzielniki akcyi znoŭ źbirajucca ŭ kałonu. Napieradzie trymajuć banier «Dzień Voli» z fatahrafijami dziejačaŭ Rady BNR.
18:48
Ludzi vyrašyli nie iści na Banhałor. Siŭčyk prapanuje iści da ŭniviersama «Ryha». Vital Rymašeŭski prapanavaŭ dajści da «Ryhi» i razyścisia da damach.
Zakachanyja na Dni Voli kala kinateatra «Kastryčnik»
18:42
Ludzi pieryjadyčna hukajuć: «Žyvie Biełaruś!» Mitynh praciahvajecca.
Niechta słuchaje vystupoŭcaŭ, bolšaść raźbiłasia na hrupki i hamonić pra svajo.
18:41
Na adnym z banieraŭ havorycca: «Vierym, možam, pieramožam. Hrunvald — Orša».
18:37
Mnostva samarobnych maleńkich płakataŭ z čornymi ptuškami: «Dzie našy piensii? Drazdy ździaŭbli». «Dzie našy hrošy? Drazdy ździaŭbli». «Drazdy da adkazu».
Adzin z udzielnikaŭ kaža: «Hałoŭnaja naša prablema — heta Drazdy».
18:35
Vystupaje sacyjał-demakrat z Barysava Aleś Abramovič.
18:31
Vystupaje ad imia pradprymalnikaŭ Aleś Makajeŭ. Kaža, što buduć źbirać podpisy ad imia IP i pieradavać u Kanstytucyjny sud. Adna z akcyj pradprymalnikaŭ płanujecca na krasavik.
Jon taksama zaklikaje vyzvalić z turmy kiraŭnika «Płatformy» Andreja Bandarenki.
Źjaviŭsia ściah Narviehii.
Fota Tut.by
18:27
Vystupaje Anatol Labiedźka. «Dzie vašy zarobki? — ich skrali Drazdy. Dzie vašy piensii? Ich skrali Drazdy. Dzie prava vybaru? Ich skrali Drazdy», — kaža jon.
18:23
Vystupaje staršynia partyi BNF Alaksiej Janukievič.
«Dziasiatki tysiačaŭ biełarusaŭ achviaravali svaim žyćciom dziela niezaležnaści, kab jana adbyłasia. I my pavinny jaje adstajać. Impierskaja Rasija nikoli nie pahodzicca, kab Biełaruś była niezaležnaj». «Biełaruś žyvie i budzie žyć», — skančaje jon pramovu.
Ludzi hukajuć «Žyvie Biełaruś!».
18:21
Vystupaje Aleś Łahviniec, jon začytaŭ zvarot staršyni Rady BNR Ivonki Surviły. «Biełaruś niekali dałučycca da jeŭrapiejskich narodaŭ. Treba ŭ heta vieryć».
18:19
Šeście dajšło da Akademii navuk, dzie ich čakali inšyja ŭdzielniki. Usiaho kala kinateatra «Kastryčnik» kala 1 000 čałaviek.
La Akademii navuk u čakańni asnoŭnaha šeścia, fota Paŭluka Bykoŭskaha.
18:17
Hałava kałony amal dajšła da kinateatra «Kastryčnik», što kala Akademii navuk.
Niaklajeŭ taksama kaža, što iści na Banhałor nie varta.
18:13
Kałona nabližajecca da Akademii navuk, pieryjadyčna sihnalać mašyny.
18:06
Mikoła Statkievič kaža, što nie źbirajecca iści na Banhałor, a skončyć akcyju la Akademii navuk.
Istotna vyrasła kolkaść udzielnikaŭ akcyi paśla taho, jak kałona dajšła da Jakuba Kołasa. U kałonie, pa roznych padlikach, ad 500 da 700 čałaviek.
Fota Tut.by
18:03
Udzielniki akcyi, jakaja ruchajecca ad parku Janki Kupały, dajšła da restarana «Lido».
Niasuć vialiki banier «Lidski kraj — šlacham voli». Jaho aŭtary pryjechali ź Lidy.
18:02
Da budynka Akademii navuk pryjšoŭ z novaj karcinkaj mastak Aleś Maračkin. Na joj adlustravany Pucin, jaki lacić na čornym samalocie ź zialonymi čałaviečkami.
18:00
Šeście dajšło da byłoha budynka Alimpijskaha kamiteta.
17:55
La pomnika Jakubu Kołasa da ŭdzielnikaŭ akcyi źviartajucca Mikoła Statkievič i Uładzimir Niaklajeŭ.
Fota Tut.by
U toj ža čas la Akademii navuk znachodzicca kala 250 čałaviek, šmat bieł-čyrvona-biełych ściahoŭ.
Šeście rušyła ŭ bok Akademii navuk.
17:54
Maładyja ludzi: 98 hod BNR — heta važnaja data i dla nas nie pusty huk. Tamu my vyrašyli adznačyć.
17:53
Udzielniki akcyi dajšli da płoščy Jakuba Kołasa.
Fota Tut.by
17:52
Niekalki ŭdzielnikaŭ pryjšli siudy cełymi siemjami.
17:47
Šeście rušyła dalej. Iduć da płoščy Jakuba Kołasa. Hałava kałony znachodzicca kala biełaruskamoŭnaj himnazii №23. Pieryjadyčna sihnalać mašyny.
***
Fota Paŭluka Bykoŭskaha
17:42
Hałava kałony prajšła tramvajnyja rejki na vulicy Kazłova. Ludzi pieryjadyčna hukajuć «Žyvie Biełaruś!» i «Vierym, možam, pieramožam!».
U manifiestacyi biare ŭdzieł mužčyna biez nahi, na kurtcy ŭ jaho bieł-čyrvona-bieły ściažok. Jon kaža: «Siabroŭ tut mnoha, ja i 100 km prajdu».
Fota Tut.by
Šeście spyniłasia na rahu praśpiekta i Kazłova, čakajuć pakul usie piarojduć.
17:38
Hałava kałony padychodzić da vulicy Kazłova. U šeści biare ŭdzieł kala 350 čałaviek.
Niekatoryja mašyny pačynajuć sihnalić.
17:34
Hałava kałona dajšła da Płoščy Pieramohi. Ludzi nie spuskajucca ŭ padziemny pierachod, a iduć naziemnym. Hukajuć «Žyvie Biełaruś», «Vierym, možam, pieramožam».
Hramadski aktyvist Pavieł Juchnievič pryjšoŭ na akcyi z dačkoj Jevaj, jakuju trymaje na šyi. «Heta śviata, i dačka heta viedaje», — kaža jon.
17:33
Zapalili pieršyja fajery. «Vyjdzi na vulicu, viarni sabie svabodu», — skandujuć niekatoryja ŭdzielniki akcyi.
17:31
Cichary iduć tak uzdoŭž praśpiekta, kab zakryvać baniery, što niasuć udzielniki, i adpaviedna, kab ich nie było vidać z praśpiekta.
17:28
Pryjšoŭ chłopiec, zahornuty va ŭkrainski ściah. Jon kaža, što Ukraina stała prykładam, a taksama vykazvaje padtrymku Nadziei Saŭčanka.
17:25
Kałona raściahnułasia ad mosta praź Śvisłač da cyrka. Na akcyju pryjechali ludzi z Baranavičaŭ i Maładziečna.
17:23
Kałona vyjšła na praśpiekt i kročyć u bok Płoščy Pieramohi. Dziaŭčyna ŭ bieł-čyrvona-biełym vianočku razdaje šakaładnyja cukierki ŭdzielnikam akcyi.
17:22
Ludzi pašychtavalisia ŭ kałonu, kab ruchacca praśpiektam u bok płoščy Jakuba Kołasa
17:19
Kala 300 čałaviek u parku. Uźniata kala 15 ściahoŭ.
Na adnym z płakataŭ napisana, što ŭ paciarpiełych ad Čarnobyla rehijonach piensijny ŭzrost pavinien być 60 hadoŭ dla mužčyn, 55 — dla žančyn.
Fota Viktara Hilickaha, kp.by
Siŭčyk prapanuje ŭšanavać chvilinaj maŭčańnia pamiać pamierłych dysidentaŭ Valeryja Siadova i Siarhieja Chanžankova.
17:15
Vystupaje Uładzimir Niaklajeŭ. «My chočam žyć nie ŭ łukašenkaŭskaj Biełarusi, a ŭ kupałaŭskaj».
U parku — 250 čałaviek.
Baćki hieroja Majdanu Michaiła Žyźnieŭskaha na akcyi ŭ Minsku
17:13
Vystupaje Anatol Labiedźka. Jon krytykuje apošnija ekanamičnyja padziei: «Bolš za 20 hadoŭ u nas niama prava vybaru». Usio bolš ludziej pačynajuć vieryć, što treba niešta mianiać u krainie, kaža jon. «Budučynia zaležyć ad nas. Tolki my pavinny vyrašać, jakija śviaty śviatkavać u krainie».
17:10
Vystupaje Viačasłaŭ Siŭčyk.
Na adnym z płakataŭ: «Tvaja chata z kraju? Krajniaja chata pieršaja i haryć».
Fota Viktara Hilickaha, kp.by
17:07
Vystupaje Sieviaryniec. Jon dziakuje ŭsim, chto pryjšoŭ siudy.
17:05
«Siońnia vialikaja data ŭ biełarusaŭ. Biełaruś nahadali śvietu, što jany nacyja, što jany chočuć niezaležnaści», — kaža Statkievič. U parku — 200 čałaviek.
Nina Bahinskaja pryjšła z płakatam «Drapiežnaja ŭłada, preč rasijskija fašysty».
17:03
Sieviaryniec hukaje «Niezaležnaść», ludzi hukajuć u adkaz.
Chłopiec trymaje płakat «BNR paŭstała biez dazvołu harvykankama».
17:03
Pačali hukać «Žyvie Biełaruś», uźniali pieršyja bieł-čyrvona-biełyja ściahi.
Statkievič pačaŭ vystup.
17:01
Kala pomnika ŭžo 100 čałaviek. Pryjšli hramadskaja aktyvistka Volha Nikałajčyk, Maryna Adamovič.
16:58
Palityki pačali ŭskładać kvietki. Statkievič vinšuje biełarusaŭ z Dniom Voli. «Toje, što zdaryłasia ŭ 1918-m, spraŭdziłasia ŭ 1991-m. Ale treba heta paćviardžać».
16:52
U parku Janki Kupały — niekalki dziasiatkaŭ čałaviek. Ludzi padychodziać. Razhortvajuć ściahi. Pryjšli Anatol Labiedźka, Mikałaj Statkievič, Pavieł Sieviaryniec, Pavieł Vinahradaŭ.
Statkievič prapanuje ŭskłaści kvietki i prajści praśpiektam, pa darozie spyniŭšysia la pomnika Jakubu Kołasu.
16:48
Mikoła Statkievič prapanavaŭ a 17-j uskłaści kvietki da pomnika Janku Kupału.
16:42
Za Pałacam Respubliki staić niekalki aŭtazakaŭ, paviedamlaje ŭ svaim fejsbuku Ina Kulej.
Siońnia, 25 sakavika, adznačajecca Dzień Voli. 98 hadoŭ tamu, u 1918 hodzie, va ŭmovach suśvietnaj vajny była abvieščana niezaležnaść Biełaruskaj Narodnaj Respubliki. Tady ŭpieršyniu ŭ najnoŭšaj historyi biełarusy zajavili pra svajo prava na dziaržaŭnaść.
A 18-j hadzinie la Akademii navuk maje raspačacca aficyjna dazvolenaje šeście ŭ honar Dnia Voli.
Mikałaj Statkievič prapanavaŭ pierad im, a 17-j hadzinie, sabracca ŭ parku Janki Kupały dla ŭskładańnia kvietak da pomnika nacyjanalnamu paetu, a potym prajści ŭ bok Akademii navuk. Na dumku Statkieviča, ułady zrabili pamyłku, ihnarujučy Dzień Voli sami i nie dajučy dazvołu na jaho adznačeńnie ŭ centry horada.
«Naša Niva» budzie vieści videa i tekstavy anłajn z akcyi.
