Palicyja tureckaha horada Iźmir zatrymała Alparsłana Čelika, jaki ŭziaŭ na siabie adkaznaść za zabojstva rasijskaha vajennaha lotčyka.
Čelika i jašče 13 padazravanych zatrymali ŭ adnym z restaranaŭ, pišuć tureckija ŚMI sa spasyłkaj na miascovyja pravaachoŭnyja orhany. U zatrymanych byli kanfiskavanyja aŭtamat i dva pistalety z patronami.
Čelik i astatnija zatrymanyja znachodziacca na dopycie va Upraŭleńni biaśpieki Iźmira. Advakaty niekatorych ź ich zajaŭlajuć, što zatrymańnie ich padabaronnych nieabhruntavanaje.
Rasijskaja presa nazyvała Čelika adnym ź lidaraŭ tureckaj radykalnaj nacyjanalistyčnaj arhanizacyi «Šeryja vaŭki». Jon zajaŭlaŭ, što stralaŭ pa piłocie źbitaha Su-24, kali toj spuskaŭsia z parašutam.
Aficyjny pradstaŭnik MZS Rasii Maryja Zacharava skazała, što Maskva praviaraje dadzienyja ab zatrymańni ŭ Turcyi mierkavanaha zabojcy.
Samalot rasijskich VKS, jaki ŭdzielničaŭ u vajennaj apieracyi ŭ Siryi, byŭ źbity na siryjska-tureckaj miažy 24 listapada 2015 hoda tureckija źniščalnikam. Kamandzir ekipaža Aleh Pieškaŭ zahinuŭ, šturmana vyratavali.
Ankara zajaviła, što rasijski bort parušyŭ tureckuju pavietranuju prastoru. Maskva heta kateharyčna adprečvała.
