Tolki ŭ hałoŭnym chole čyhunačnaha vakzała Minska možna naličyć ažno 8 eskałataraŭ. Samyja doŭhija i zaŭvažnyja ź ich viaduć prosta ad centralnaha ŭvachodu na treci pavierch. Paabapał eskałataraŭ zvyčajnyja leśvicy — pa 50 prystupak u kožnaj. Uźniacca pa ich navat 30-hadovamu mužčynu ŭ roskvicie siłaŭ bieź ciažkich čamadanaŭ i torbaŭ nie tak lohka. Što ŭžo havaryć pra bolš stałych i słabych pasažyraŭ z bahažom.
Ale niekalki tydniaŭ ludzi abirajuć bolš składany šlach i ŭzdymajucca da zały čakańnia i kaviarniaŭ pieški — eskałatary banalna nie pracujuć. La ich šyldy z prośbami skarystacca liftam. Zrabić heta niaprosta — la liftaŭ utvarajucca nievialikija čerhi, davodzicca čakać. Toje samaje ź mienšymi eskałatarami, što viaduć z choła na padziemny pavierch i da tuniela, praź jaki možna vyjści na pierony. Dniom 30 sakavika na vakzale pracuje tolki adzin z eskałataraŭ — bakavy. Padniacca pa im možna tolki na treci pavierch.
Načalnik stancyi «Minsk-Pasažyrski» Alaksandr Drožža prablemu pryznaje. Havoryć, što 1-2 eskałatary na vakzale ŭsio ž pracujuć:
«Častka eskałataraŭ pracuje. My ich pryvodzim u adpaviednaść ź dziejnymi praviłami. To 1, to 2 pracujuć. Ź pieršaha na treci pavierch možna padniacca. A kali nie padychodzić taki varyjant, to možna skarystacca liftam. Absalutna ŭsie lifty pracujuć», — pierakonvaje čynoŭnik.
Ale ŭ čym pryčyna niazručnaściaŭ? Lifty, navat kali jany pracujuć vydatna i ŭsie adrazu, prosta nie ŭ stanie spravicca z patokam pasažyraŭ. Jak stała viadoma ad krynicy ź liku supracoŭnikaŭ «Biełaruskaj čyhunki», pryčynaj raptoŭnaha adklučeńnia bolšaści eskałataraŭ na minskim čyhunačnym vakzale stała… žadańnie sekanomić na elektraenierhii. Maŭlaŭ, u siońniašnich umovach hety ciažar staŭ niepadjomnym dla vakzalnaha načalstva.
Alaksandr Drožža nazyvaje takuju viersiju «pamyłkaj» i častkova nazyvaje sapraŭdnuju. Jana ździŭlaje nie mienš. Akazvajecca, z pačatkam Novaha hoda ŭsie vakzalnyja eskałatary raptam… pierastali adpaviadać techničnym normam:
«Na siońniašni dzień eskałatary nie adpaviadajuć patrabavańniam novych pravił. Dziaržpramnahlad u minułym hodzie pryniaŭ novyja praviły. Jany praviali pravierku i zabaranili nam ekspłuatacyju eskałataraŭ. U dadzieny momant my ich pryvodzim u adpaviednaść z praviłami», — havoryć načalnik stancyi «Minsk-Pasažyrski».
Paviedamić, u čym mienavita zaklučajecca nieadpaviednaść vakzalnych eskałataraŭ novym normam, čynoŭnik admaŭlajecca, spasyłajučysia na składanaść farmulovak. Nieviadoma taksama, kali eskałatary na hałoŭnym čyhunačnym vakzale krainy znoŭ buduć pracavać. Tak što pakul daviadziecca ciahacca pieššu.
