Sudovyja vykanaŭcy pačali palavańnie na lidaraŭ biełaruskaj apazicyi i aktyvistaŭ.
Tak, da prykładu, 29 sakavika Mikałaja Statkieviča vyklikali ŭ Leninskaje RUUS Minska nibyta dla prafiłaktyčnaj hutarki, ale na miescy jaho ŭžo čakali sudovyja vykanaŭcy. Pa słovach byłoha palityčnaha źniavolenaha, jamu prapanavali raśpisacca za toje, što ŭ jaho majucca try štrafy ahulnaj sumaj 25,2 miljona. Na nastupny dzień byŭ nakładzieny aryšt na hrošy, jakija znachodziacca na bałansie mabilnaha telefona lidara AHP Anatola Labiedźki, a taksama na aŭtamabili jaho i jaho žonki. Z takimi ž prablemami sutyknulisia aktyvisty «Jeŭrapiejskaj Biełarusi» Maksim Viniarski i Leanid Kułakoŭ.
Sudovyja vykanaŭcy viaduć palavańnie i za inšymi aktyvistami. Siarod ich užo šmatkroć aštrafavany tolki za hety hod adzin ź lidaraŭ biełaruskich pradprymalnikaŭ Aleś Makajeŭ, jaki prakamientavaŭ situacyju:
«Siońnia mianie vyklikali pa telefonie ŭ RUUS Leninskaha rajona nibyta dla prafiłaktyčnaj hutarki z nahody mitynhu pradprymalnikaŭ 14 sakavika. Na hetuju tak zvanuju prafiłaktyčnuju razmovu ja nie pajšoŭ. Pa-pieršaje, vyklikać na takija mierapryjemstvy pavinny pozvaj. Pa-druhoje, niešta mnie padkazvaje, što heta banalnaja «padstava» — chutčej za ŭsio, zamiest prafiłaktyčnaj hutarki mianie tam čakali sudovyja vykanaŭcy.
Nieapłačanych štrafaŭ za akcyi i mitynhi ŭ mianie ŭžo naźbirałasia na sumu kala 100 miljonaŭ biełaruskich rubloŭ. Kala troch tydniaŭ mianie ŭparta šukajuć sudovyja vykanaŭcy. Jany pisali paviedamleńni ŭ sacyjalnych sietkach maim svajakam i siabram, telefanavali majoj žoncy, prychodzili na pracu da majoj cieščy i pa miescy prapiski…
Sudovy vykanaŭca Maskoŭskaha rajona paviedamiła mnie pa telefonie, što na mianie ŭžo nakładzienaja zabarona na vyjezd za miažu. Ja nie razumieju, navošta jany hrajuć uvieś hety śpiektakl — ja ž nie chavajusia! Praŭda, uziać ź mianie niama čaho — z pačatku hoda ja zastaŭsia biez pracy, svajoj majomaści ŭ mianie niama. Dy i žadańnia spansiravać režym niama. Tym bolš, što ničoha supraćzakonnaha ja nie rabiŭ. Usie hetyja prysudy — fikcyja».
