Alaksandr Łukašenka vykazaŭ zaniepakojenaść u suviazi ź situacyjaj, jakaja skłałasia ŭ zonie karabachskaha kanfliktu. Pra heta paviedamili ŭ efiry telekanał «Biełaruś 1» sa spasyłkaj na pres-sakratara kiraŭnika dziaržavy, paviedamlaje BiełTA.
Siońnia adbyłasia telefonnaja razmova Alaksandra Łukašenki z prezidentam Azierbajdžana Ilchamam Alijevym.
«Prezident Biełarusi vykazaŭ zaniepakojenaść u suviazi ź situacyjaj, jakaja skłałasia ŭ zonie karabachskaha kanfliktu. Lidery dźviuch krain padrabiazna abmierkavali padziei, što adbyvajucca. Ilcham Alijeŭ u detalach prainfarmavaŭ Alaksandra Łukašenku ab usich abstavinach vakoł incydentu», — paviedamili na telekanale.
Jak paviedamlałasia siońnia ranicaj, Ministerstva abarony Azierbajdžana zajaviła, što armianskija vojski nanieśli ŭdary pa ŭsich pamiežnych pazicyjach azierbajdžancaŭ, užyvajučy minamioty, hranatamioty i artyleryjskija ŭstanoŭki. Pa śćviardžeńni Azierbajdžana, armianie 127 razoŭ parušyli režym spynieńnia ahniu.
Ministerstva abarony Armienii zajaviła, u svaju čarhu, što azierbajdžanskaja armija raspačała sprobu nastupu, vykarystoŭvajučy tanki, artyleryju i avijacyju. Armienija pryhraziła Azierbajdžanu niepradkazalnymi nastupstvami ŭ vypadku praciahu bajavych dziejańniaŭ.
Abodva baki kanfliktu śćviardžajuć, što praciŭnik niasie vialikija straty ŭ chodzie praciahu bajoŭ. Armianie zajavili, što na adnym z učastkaŭ bajoŭ byŭ źbity azierbajdžanski viertalot. Ministerstva abarony Azierbajdžana abvierhła hetyja źviestki, nazvaŭšy ich chłuśnioj i pravakacyjaj.
