 |
Vielmi smačnaja padborka śviežych biełaruskamoŭnych rok‑hitoŭ, sabranych aktyvistami partyi BNF u adzin dysk u honar 90‑hodździa BNR.
Častka ź piesień viadomaja z hit‑paradu «Tuzin Hitoŭ», častka (amal pałova) zapisanaja admysłova dla hetaj składanki. Razynak i siurpryzaŭ na dysku ŭdostal. Heta i novaja (urešcie!) pieśnia hurtu Pomidor/off — hodny praciah «Śviata pakradzienaha» i nieapublikavanaja jašče «Miensk» na chrestamatyjny vierš — uryvak ź «Ściahu bryhady» Kulašova ŭ vykanańni miortvaha ŭžo hurtu Siver, heta i pierapisanyja nanoŭ «Try čarapachi» z krychu źmienienym tekstam u prypievie.
Praciahvać možna biaskonca. Ale ž samy mahutny hit zapisali mahiloŭskija «Hluki».
U ich «Prahramie» nadta ŭdała spałučajecca saładžavaść, meladyčnaść i žorstkaść. Zroblena ŭsio prosta, ale akuratna, kožnaja detalka vypiestavanaja. Pieśnia paprostu ŭzornaja! Hałoŭnaje rasčaravańnie składanki — IQ48, jakija ŭzialisia śpiavać na Janku Kupału («Hej, napierad»). Pa‑pieršaje, sam trek vielmi syry z čysta techničnaha hledzišča (nie paśpieli, vidać, u termin uchadzicca), a pa‑druhoje, adčuvajecca ŭ im niejkaja sklapanaść, niama harmaničnaha spałučeńnia muzyki i tekstu (čaho nia skažam pra takija pieśni, jak «Vyjście» ci «Śviatło ŭ ciemry»). «NiezaležnyJa» anijak nielha nazvać «supolnym muzyčnym prajektam», choć toje i napisana vialikimi litarami na vokładcy — hetki pradusarski chitryk, ale ŭdałaj kampilacyjaj — dyk i lohka!
