RHA «Pierśpiektyva» admaŭlajuć u arendzie załaŭ dla praviadzieńnia ekanamičnaha forumu pradprymalnikaŭ, paviedamiŭ BiełaPAN staršynia savieta abjadnańnia Anatol Šumčanka.
Jon skazaŭ, što vioŭ pieramovy ź mieniedžarami hatela «Biełaruś» ab arendzie zały 16 maja. «Tam admovili. Spasłalisia na toje, što dyrektar kateharyčna suprać. Maŭlaŭ, byli telefanavańni ź Minharvykankama adnosna apošnich forumaŭ. Niešta im nie spadabałasia», — adznačyŭ kiraŭnik «Pierśpiektyvy».
Tady Šumčanka źviarnuŭsia da kiraŭnictva kamunalnaj haścinicy «Viktoryja», pradstaŭnica jakoj pahadziłasia dać u arendu kanhres-choł i paprasiła pryvieźci harantyjny list. «Siońnia ranicaj ja pryvioz list, rastłumačyŭ, što forum nosić ekanamičny farmat. Potym mnie patelefanavali i paviedamili: Minharvykankam skazaŭ kateharyčna «nie», — adznačyŭ kiraŭnik pradprymalnickaha abjadnańnia.
Tema forumu — «Pradprymalniki i ŭłada: adkryty dyjałoh pa ŭmacavańni i raźvićci davieru». «Niezrazumieła, na jakoj padstavie harvykankam ŭmiešvajecca ŭ našy spravy. My, viadoma, razumiejem, u jakoj dziaržavie žyviem. Mižnarodnuju hramadskaść ułady zapeŭnivajuć u tym, što ŭ nas demakratyja. Ale i my na płošču nie idziem, idziem u zału. Nas i adtul honiać. Niezrazumieła, čamu z-za mierkavańnia niejkaha čynoŭnika hateli nie chočuć zarablać, dajučy ŭ arendu zału», — aburyŭsia Šumčanka.
Jon pasprabavaŭ atrymać rastłumačeńni ŭ Minharvykankamie, dzie jamu paabiacali patelefanavać.
«My chočam davieści da ŭładaŭ dumku, što naš forum maje vyklučna ekanamičny farmat. Mnie zdajecca, što siońnia trend na dyjałoh z uładaj pavinien być vyhadny ŭsim bakam. Tyja, chto ŭstaŭlajuć pałki ŭ koły, albo nie zrazumieli, albo nie pierastroilisia ŭ realii, u jakich apynułasia naša kraina», — zaznačyŭ Šumčanka.
Pavodle jaho słoŭ, forum budzie praviedzieny ŭ lubym vypadku. «Ale ja ŭsio roŭna vyśvietlu, chto maje dačynieńnie da admoŭ. Liču, što razumny sens pieramoža», — reziumavaŭ aktyvist.
