Prakuror Kryma Natalla Pakłonskaja vyniesła rašeńnie ab prypynieńni dziejnaści miedžlisa krymskich tataraŭ. Kopiju dakumienta apublikavaŭ u svaim fejsbuku advakat Džemil Temišaŭ, jaki pradstaŭlaje intaresy miedžlisa ŭ sudzie.
Reuters
«Siońnia mnoj było pryniata rašeńnie ab prypynieńni dziejnaści hramadskaha abjadnańnia «Miedžlis krymska-tatarskaha naroda» u metach niedapuščeńnia parušeńnia fiederalnaha zakanadaŭstva», — zajaviła Pakłonskaja ahienctvu TASS.
U svaim rašeńni prakuror anieksavanaha Rasijaj paŭvostrava spasyłajecca na zakon «Ab supraćdziejańni ekstremisckaj dziejnaści».
«Sabranymi dokazami paćviardžajecca, što mety i dziejańni zhadanaha hramadskaha abjadnańnia nakiravanyja na ažyćciaŭleńnie ekstremisckaj dziejnaści», — havorycca ŭ apublikavanym Temišavym dakumiencie.
U hutarcy z ahienctvam TASS advakat zajaviŭ, što Miedžlis budzie abskardžvać rašeńnie.
«Naš pracesualny apanient, razumiejučy, što sudovyja pierśpiektyvy vyniasieńnia hetaha rašeńnia amal nierealnyja, usio ž taki nastojvaje na prypynieńni dziejnaści takim voś šlacham. Viadoma, my heta budziem abskardžvać», — skazaŭ jon.
Viarchoŭny sud Kryma razhladaje spravu ab pryznańni ekstremisckaj arhanizacyjaj miedžlisa krymskatatarskaha naroda i zabaronie jaho dziejnaści na terytoryi Rasii.
Pradstaŭniki arhanizacyi ličać sud palityčna matyvavanym i nazyvajuć praces častkaj represij suprać krymskich tataraŭ.