FSB raspačała spravu suprać žurnalista partała «Krym.Riealii» pa padazreńni ŭ zaklikach da parušeńnia terytaryjalnaj cełasnaści Rasii. Pa słovach prakurora Kryma, sprava była raspačata za artykuły pra błakadu paŭvostrava.
Upraŭleńnie FSB pa Krymie zaviało spravu ŭ dačynieńni da žurnalista partała «Krym.Riealii» (prajekt «Radyjo Svaboda»), paviedamiła prakuror Kryma Natalla Pakłonskaja.
Pavodle jaje słoŭ, sprava raspačata pa padazreńni ŭ zaklikach da parušeńnia terytaryjalnaj cełasnaści Rasii z vykarystańniem srodkaŭ masavaj infarmacyi (č.2 st.280.1 KK RF). Imia žurnalista, u dačynieńni da jakoha FSB raspačała spravu, Pakłonskaja nie nazvała.
«Hetym žurnalistam byŭ padrychtavany i apublikavany artykuł, u jakim pryvodziacca vykazvańni, nakiravanyja na parušeńnie terytaryjalnaj cełasnaści RF, što nie dazvolena ni žurnalistam, ni kamu-niebudź inšamu», — zajaviła prakuror Kryma (cytata pa TASS).
Jana ŭdakładniła, što publikacyja była pryśviečana błakadzie Kryma ŭkrainskimi aktyvistami. Pa słovach prakurora, padobnyja materyjały ŭ Krymie rasceńvajuć jak apraŭdańnie teraryzmu.
«Faktyčna jany apraŭdvajuć dziejańni ekstremistaŭ i terarystaŭ. My nie dazvolim ździajśniać złačynstvy ŭ dačynieńni da hramadzian Rasijskaj Fiederacyi i Rasii ŭ cełym. Status žurnalista abaviazvaje vykonvać patrabavańni zakanadaŭstva», — padkreśliła prakuror.
Pakłonskaja adznačyła, što chod rasśledavańnia ŭziaty na kantrol prakuraturaj Kryma. «U ciapierašni čas vyrašajecca pytańnie ab abrańni miery strymańnia dla žurnalista», — dadała jana.