Na zbory ŭ Francyi ŭ nacyjanalnaja zbornaj Biełarusi pa viesłavańni na bajdarkach i kanoe prajšli pieratrusy. Pra heta na sustrečy z žurnalistami raspavioŭ hałoŭny trenier kamandy Uładzimir Šantarovič.
Pa jaho słovach, pieratrus inicyjavała antydopinhavaje ahienctva Paryža. Prakuror horada Ažen dazvoliŭ pieratrus z pryciahnieńniem palicejskich sił. Hetkim čynam francuzy mierkavali znajści zabaronienaje dopinhavaje rečyva — mieldonij.
Pieratrusy adbylisia 12 krasavika. Nijakaha mieldoniju pradstaŭniki francuzskaj antydopinhavaj łabaratoryi razam z palicyjaj i žandarami nie znajšli. Uviečary taho ž dnia prajšli dopyty spartoŭcaŭ. «Pryčym našych viadučych atletaŭ sprabavali spravakavać, kab jany pryznalisia va ŭžyvańni zabaronienaha preparata. Ja ŭ prafiesijnym sporcie bolš za 40 hadoŭ i nikoli ni z čym takim nie sutykaŭsia. Raniej sam tolki pa televizary bačyŭ, jak hrupa siłavikoŭ ŭvachodzić u jaki-niebudź pryton. Niešta padobnaje było ciapier i ŭ Francyi», — pieradaje BIEŁTA słovy Šantaroviča.
Trenier nazvaŭ vypadak pravakacyjaj, nakiravanaja na adchileńnie zbornaj pa viesłavańni na bajdarkach i kanoe ad udziełu ŭ budučaj Alimpijadzie.
Šantarovič kaža, što mieldonij u kamandzie ŭžyvali da taho, jak jon byŭ zabaronieny — da kastryčnika 2015 hoda.
Paśla viartańnia z Francyi nacyjanalnaja zbornaja Biełarusi pa viesłavańni na bajdarkach i kanoe praciahnie padrychtoŭku da budučaha siezonu ŭ Breście.