Hienieralny sakratar NATA Jens Stołtenbierh zajaviŭ, što na Rasii lažyć asablivaja adkaznaść za vykanańnie Minskich pahadnieńniaŭ, bo jana praciahvaje padtrymlivać sieparatystaŭ na paŭdniovym uschodzie Ukrainy.
Jak zajaviŭ Stołtenbierh na pres-kanfierencyi paśla pasiadžeńnia rady «Rasija—NATA», bolšaja častka roznahałośsiaŭ pamiž Paŭnočnaatłantyčnym aljansam i Rasijaj tyčycca dziejańniaŭ Maskvy ŭ dačynieńni da Kryma i situacyi na Danbasie.
«Na sustrečy było paćvierdžana, što ŭ nas hłybokija roznahałośsi datyčna padziej va Ukrainie i adkaznaści za ich», — skazaŭ jon.
«Mnohija sajuźniki nie zhodnyja sa sprobaj Rasii pradstavić hetyja padziei jak hramadzianskuju vajnu. Tamu tut my natyknulisia na roznahałośsi», — reziumavaŭ kiraŭnik NATA.
Stały pradstaŭnik Rasii pry NATA Alaksandr Hruško u svaju čarhu skazaŭ, što na sustrečy abmiarkoŭvalisia miery pa demilitaryzacyi Danbasa, uklučajučy zabaronu na raźmiaščeńnie pablizu ad linii raźmiežavańnia novych sistem uzbrajeńniaŭ i demilitaryzacyi.
Taksama Hruško adznačyŭ, što nie bačyć pierśpiektyvy palapšeńnia adnosin pamiž Rasijaj i Aljansam z-za sprobaŭ akazać na Rasiju «vajenny cisk».
Jak pieradaje ahienctva Rejter, Hruško źviazaŭ heta z pavieličeńniem kolkaści kantynhientaŭ NATA ŭ susiednich z Rasijaj krainach.
Pasiadžeńnie rady «Rasija—NATA», jakoje adbyłosia 20 krasavika, - pieršaje paśla rasijskaj anieksii Kryma. Stołtenbierh nazvaŭ praviedzienuju razmovu adkrytaj.
Jon padkreśliŭ, što hetaja sustreča nie źjaŭlajecca viartańniem da narmalnaj pracy rady, ale vykazaŭ nadzieju, što rada zmoža sustrecca znoŭ u budučyni.