Apošnim časam prahramy hałasavoj IP-telefanii stali vielmi papularnymi. Padobny sposab znosinaŭ – vydatnaja mahčymaść nie pierapłačvać za svaje zvanki i paviedamleńni.
Pieršapačatkova samym papularnym servisam IP-telefanii ŭ śviecie była estonskaja prahrama Skype, ale potym u Skype źjaviŭsia mocny kankurent u vyhladzie biełaruskaj prahramy Viber. «Naša Niva» vyrašyła praanalizavać, jakija jość inšyja prahramy i servisy z padobnym funkcyjanałam dla ažyćciaŭleńnia zvankoŭ praź Internet.
Google Hangouts
Mała chto zdahadvajecca, adnak interfiejs Google dazvalaje ažyćciaŭlać zvanki inšym karystalnikam, u jakich jość pošta na Google. Z dapamohaj Hangouts možna stvarać hrupavyja čaty (da 100 karystalnikaŭ) i videakanfierencyi dla 10 karystalnikaŭ. Servisam možna karystacca jak z dapamohaj veb-braŭziera, tak i praz mabilnyja prahramy dla Android i iOS. Dla taho, kab karystacca Hangouts, rehistracyja nie patrebnaja. Dastatkova mieć paštovuju skryniu Gmail. Prahrama dobra intehravanaja z Google+ i adrasnaj knihaj. Takim čynam, usie kantakty ŭžo sabranyja ŭ adnym miescy i ich nie treba šukać asobna. Servis taksama dazvalaje pierasyłać dakumienty, jakija sinchranizujucca z Google Disk. Funkcyjanał Hangouts dazvalaje telefanavać nie tolki inšym karystalnikam servisu, ale i na zvyčajnyja numary, chacia heta i supiarečyć viadomamu biełaruskamu ŭkazu №98 «Ab udaskanaleńni paradku pieradačy paviedamleńniaŭ elektrasuviazi». Cikava, što prahrama dazvalaje telefanavać na mabilnyja i stacyjanarnyja numary ŭ ZŠA i Kanadu biaspłatna.
Hangouts nie maje rekłamy, u adroźnieńnie ad Skype, i maje davoli prosty i zrazumieły interfiejs. Niahledziačy na funkcyjanalnaść, servis maje zručnyja i prostyja nałady, u tym liku nałady biaśpieki i pryvatnaści.
Kali kazać pra niedachopy prahramy, to heta:
- Adsutnaść mahčymaści vydalać karystalnikaŭ z čatu. Dla realizacyi hetaha dziejańnia treba vydalać całkam čat i stvarać novy bieź niepažadanaha ŭdzielnika.
- Adsutnaść prahramy na PK. Na piersanalnym kampjutary dostup da servisu ažyćciaŭlajecca tolki praz braŭzier.
- Niemahčymaść adpraŭlać u paviedamleńniach videaroliki.
KakaoTalk
Dadzienaja prahrama małaviadomaja ŭ Biełarusi, ale vielmi papularnaja ŭ ZŠA, Japonii, Indanezii i na svajoj Radzimie — u Paŭdniovaj Karei. U Jeŭropie prahrama papularnaja tolki siarod fanataŭ K-Pop. Ale jość usie šancy, što prahrama budzie mieć vialikuju kolkaść karystalnikaŭ i ŭ nas.
KakaoTalk maje ŭvieś standartny nabor sučasnych miesiendžaraŭ: heta i mahčymaść dasyłać paviedamleńni, i ažyćciaŭlać zvanki (jak videa, tak hukavyja), i stvarać hrupavyja čaty. Hrupavyja čaty, darečy, heta adna ź pieravah dadzienaha servisu, bo ŭ KakaoTalk niama nijakich abmiežavańniaŭ na kolkaść udzielnikaŭ u čacie (u Viber, naprykład, kolkaść udzielnikaŭ razmovy abmiežavanaja ličbaj 200).
Taksama KakaoTalk z šerahu inšych padobnych servisaŭ vyłučaje vialikaja kolkaść cikavych dadatkovych funkcyj:
- funkcyja skažeńnia hołasu pry telefanavańni
- mahčymaść dadać siabra, prosta strasianuŭšy vašymi telefonami u niepasrednaj blizkaści adzin da adnaho, albo z dapamohaj QR-koda
- intehracyja ź inšymi servisami Kakao (KakaoMusic, KakaoStyle, KakaoHome, KakaoPage i h.d.);
- praktyčna biaskoncaja kolkaść tem afarmleńnia, smajłaŭ i h.d.
Ź niedachopaŭ možna adznačyć toje, što:
- nielha impartavać kantakty ź inšych miesiendžaraŭ
- kampanija ŭ 2014 hodzie zajaviła, što budzie pracavać sa śpiecsłužbami. Paźniej kampanija vybačyłasia pierad karystalnikami, ale padobnyja zajavy, źviazanyja ź biaśpiekaj dadzienych, nie vyklikajuć asablivaha davieru ŭ karystalnikaŭ.
Raniej prahrama była zvyčajnym miesiendžaram, ale letaś źjaviłasia funkcyja hałasavych zvankoŭ pamiž karystalnikami. Takim čynam, WhatsApp staŭ kankurentam dla Skype i Viber. Na žal, videazvanki dla karystalnikaŭ niedastupnyja, chacia kampanija WhatsApp raniej paviedamlała, što hetaja funkcyja źjavicca ŭ chutkim časie.
Pryjemna dla karystalnikaŭ prahramy toje, što raniej jana była płatnaja (99 centaŭ za hod), ale z 2016 hodu stała biaspłatnaj, pry hetym u joj pryncypova adsutničaje rekłama.
Akramia hetaha, z pačatku krasavika 2016 hodu prahrama WhatsApp pačała vykarystoŭvać ałharytm skraznoha šyfravańnia. WhatsApp śćviardžaje, što z dapamohaj dadzienaha ałharytmu paviedamleńni zmohuć ubačyć tolki adpraŭnik i atrymalnik. Navat WhatsApp nie zmoža pračytać vašyja paviedamleńni, tamu što klučy šyfravańnia ŭnikalnyja i dostup da ich jość tolki ŭ adpraŭnika i atrymalnika.
Ekśpierty miarkujuć, što WhatsApp byŭ vymušany pajści na taki krok paśla taho, jak amierykanskija ŭłady pačali cisnuć na kampaniju, kab atrymać kanfidencyjnyja dadzienyja karystalnikaŭ.
ooVoo
Cikavaja alternatyva dla Skype i Viber. Akramia standartnaha naboru funkcyj, servis maje nastupnyja pieravahi nad kankurentami:
- dazvalaje pravodzić videakanfierencyi dla 12 karystalnikaŭ (u toj čas jak Skype-kanfierencyja abmiežavana 10-ju karystalnikami)
- možna źviazvacca navat z karystalnikami, u jakich niama rehistracyi na ooVoo i jakija nie majuć na svaich kampjutarach adpaviednaha prahramnaha zabieśpiačeńnia. Dastatkova zhienieravać spasyłku, dasłać jaje surazmoŭcu, i surazmoŭca zmoža praz braŭzier vyjści z vami na suviaź.
Maksifon ad Biełtelekama
U dadzieny momant pasłuha Maksifon fizičnym asobam nie pradastaŭlajecca, tolki jurydyčnyja asoby mohuć padklučycca na 1 z 3 taryfnych płanaŭ. Taryf «Svabodny» dazvalaje telefanavać abanientam «Biełtelekama» za 80 rubloŭ za chvilinu i 320 rubloŭ za chvilinu za zvanok na mabilny numar. Taryfy «Kampańjon» i «Kampańjon Plus» prapanoŭvajuć pa 400 i 800 chvilin dla zvankoŭ abanientam «Biełtelekamu» za 52 000 rub. i 100 000 rub. adpaviedna. Zvanki (u tym liku videazvanki) z Maksifona na Maksifon dla abanientaŭ «Kampańjon» i «Kampańjon Plus» biaspłatnyja. Abanienty Maksifon mohuć atrymać realny numar u farmacie +375 24 9chch chch chch. Raniej padklučycca da dadzienaj pasłuhi mahli i fizičnyja asoby, ale z 21 sakavika Biełtelekam časova prypyniŭ padklučeńnie novych abanientaŭ ź liku fizičnych asob «u suviazi z płanavaj madernizacyjaj prahramnaha zabieśpiačeńnia».
