Administracyjnaja sprava ŭ dačynieńni da staršyni Partyi BNF Alaksieja Janukieviča za ŭdzieł u akcyi 25 sakavika z nahody Dnia Voli razhledzić sud Savieckaha rajona Minska 28 krasavika.
U poźvie, jakuju atrymaŭ palityk, havorycca, što jon abvinavačvajecca ŭ parušeńni paradku praviadzieńnia masavych mierapryjemstvaŭ, učynienym paŭtorna na praciahu hoda paśla nakładańnia administracyjnaha spahnańnia za takija ž parušeńni (č. 3 art. 23.34 KoAP), paviedamlaje pres-słužba partyi. Janukieviču staviać u vinu toje, što na placoŭcy kala kinateatra «Kastryčnik» jon «uziaŭ aktyŭny ŭdzieł u mitynhu, što vyjaviłasia ŭ masavaj prysutnaści hramadzian i vykrykvańni łozunhaŭ, čym parušyŭ zakanadaŭstva».
«Zaraz ułady vymušanyja admovicca ad administracyjnych aryštaŭ, ale pry hetym jany ŭsio šyrej vykarystoŭvajuć štrafy, imknučysia źbić hramadskija pratesty. Pry hetym ja nie vyklučaju, što nieŭzabavie moža viarnucca i praktyka administracyjnych aryštaŭ», — skazaŭ Janukievič.
Pratakoły za ŭdzieł u akcyi 25 sakavika byli składzienyja taksama ŭ dačynieńni da Alesia Łahvinca, Vitala Rymašeŭskaha, Anatola Šumčanki, Mikałaja Statkieviča, Paŭła Sieviarynca, Anatola Labiedźki, Uładzimira Niaklajeva, Ryhora Kastusiova i inšych aktyvistaŭ demsiłaŭ.
Namieśnika staršyni ruchu «Za Svabodu» Alesia Łahvinca budzie sudzić sud Centralnaha rajona Minska taksama 28 krasavika. Labiedźka i Niaklajeŭ užo aštrafavanyja sudom Centralnaha rajona na 50 bazavych vieličyń kožny (pa 10,5 młn rubloŭ).
