«Zadača transpartnaj sistemy - pierasoŭvańnie ludziej, a nie transpartnych srodkaŭ», - heta adna ź viadomych cytat prafiesara Piensilvanskaha ŭniviersiteta Vukana Vučyka.
Udzielniki sieminara «Novyja instrumienty intehravanaha haradskoha i transpartnaha płavańnia», jaki prajšoŭ u Minsku, abmiarkoŭvali, jak pierachodzić ad tradycyjnaha płanavańnia da inavacyjnych padychodaŭ. Adnym z zamiežnych haściej sustrečy byŭ Džerom Simpsan, starejšy ekśpiert prahramy «Razumnyja harady i mabilnaść» (Budapiešt, Vienhryja).
Jon raspavioŭ pra suśvietnyja trendy ŭ śfiery haradskoha mabilnaści, jakija mohuć być aktualnyja i dla Biełarusi.
Admova ad bienzina i dyziela
«Niekatoryja mety, jakija možna źviazać z ustojlivaj haradskoj mabilnaściu, nadzvyčaj ambitnyja - naprykład, admovicca ad tradycyjnaha paliva ŭ haradach. Heta značyć, my pavinny pierajści elektramabili ci alternatyŭnyja vidy paliva. Prahramy pa pierachodzie na novyja vidy paliva buduć raspracavanyja ŭsimi haradami Jeŭrasajuza da kanca 2016 hoda», - raskazaŭ Džerom Simpsan.
Rehulavańnie ci abmiežavańnie dostupu ŭ centr horada
Adnym sa šlachoŭ raźvićcia haradskoj mabilnaści Džerom Simpsan bačyć rehulavańnie ci abmiežavańnie dostupu ŭ centr haradoŭ.
Darečy, padčas sieminara vystupoŭcy zhadvali padobnuju ideju dla realizacyi ŭ Minsku. Paśla zakančeńnia budaŭnictva pieršaha transpartnaha koła moža być abmiežavany tranzitny ruch aŭtamabilaŭ pa vulicy Niamiha.
Taksama abmiarkoŭvałasia pytańnie ab abmiežavańni ruchu hruzavych aŭtamabilaŭ u centry Minska ŭ budnija dni.
Vykarystańnie rovaraŭ, u tym liku hruzavych
Ekśpiert Džerom Simpsan niekalki razoŭ uzhadvaŭ karyść ad raźvićcia viełasipiednaha ruchu. Pavodle statystyki, pryviedzienaj im, tyja, chto rehularna jeździć na rovary, žyvuć na 2 hady daŭžej i biaruć na 15% mienš balničnych.
Adnak aproč taho, ekśpiert nadaje asablivuju ŭvahu svabodnamu pierasoŭvańniu tavaraŭ i pasłuh u bujnych haradach. Na jaho dumku, usio bolš važnuju rolu buduć adyhryvać hruzavyja viełasipiedy. Jany kaštujuć našmat tańniej za mataryzavanyja vidy transpartu i pry hetym nie zabrudžvajuć pavietra i nie patrabujuć nijakaha paliva.
«Ad 51% da 68% usioj haradskoj łahistyki moža być vykarystana z dapamohaj rovaraŭ zvyčajny ci hruzavych», — pierakanany Džerom Simpsan. Heta skarocić kolkaść hruzavikoŭ u centry horada.
Sumiesnaje vykarystańnie aŭtatranspartu
Heta adzin z trendaŭ na Zachadzie. Vykarystańnie aŭtamabilu, u sałonie jakoha znachodzicca tolki adzin kiroŭca, stvaraje lišni trafik i bje pa ekałohii.
Praktyka «kar-šerynhu» (sumiesnaha vykarystańnia aŭto) šyroka raspaŭsiudžana ŭ bolšaści krain Zachodniaj i Centralnaj Jeŭropy, jana značna źnižaje vydatki padarožnikaŭ i dapamahaje zachavać navakolnaje asiarodździe.
Raźvićcio čyhunačnaha i vodnaha transpartu
Na dumku ekśpierta, pasažyrskija i hruzavyja pieravozki musiać na 50% pierajści z aŭtatranspartu na čyhunku i vodny transpart.
Jakuju vyhadu atrymaje hramadstva ad realizacyi hetych prapanoŭ i dalejšaha raźvićcia ŭstojlivaj haradskoj mabilnaści?
* * *
Ekśpiert Džerom Simpsan miarkuje, što pieravahi buduć mieć roznyja sacyjalnyja i ekanamičnyja hrupy. Ludzi zmohuć zaščadzić hrošy, kali chodziać pieššu ci karystajucca viełasipiedam albo hramadskim transpartam, a nie asabistym aŭtamabilem.
Ekanamičny siektar, u tym liku transpartyja kampanii, atrymajuć bolšuju kolkaść klijentaŭ. Taksama buduć mieć popyt raspracoŭka pryładaŭ mabilnaści i ekałahičnych inicyjatyŭ.
Narešcie, hramadstva atrymaje lepšaje ekałahičnaje asiarodździe i ekanomiju ŭ śfiery achovy zdaroŭja.
