Niepryjemnaja historyja adbyłasia 3 traŭnia ŭ minskim supiermarkiecie «HIPPA»na vulicy Sucharaŭskaj, 31. 14-hadovy Kastuś idzie ŭ kramu pa pradukty, kuplaje ŭsio, što paprasili baćki, raźličvajecca i źbirajecca viartacca dadomu, ale chłopčyka spyniajuć supracoŭniki słužby biaśpieki.
«Syn, kali viarnuŭsia z kramy, to raskazaŭ, što jaho praviarali ŭ asobnym pakoi. Hladzieli, ci nie skraŭ jon niešta ŭ kramie. Jak raźličyŭsia na kasie, to adrazu adviali. Pravieryli zaplečnik i adpuścili — tam ničoha nie było», — raskazvaje maci Kastusia Taćciana Hacura-Javorskaja.
Pa jaje słovach, 14-hadovy Kastuś časta chodzić za praduktami ŭ kramu adzin i raniej nijakich prablem z achoŭnikami nie mieŭ.
«Maksimum, heta kali chadziŭ ź siabrami, to kazaŭ, što achoŭnik za imi sačyŭ, chadziŭ śledam, ale heta maksimum», — raskazvaje Taćciana.
Niahledziačy na toje, što pa słovach syna achoŭniki pavodzili siabie karektna, jana ŭžo napisała skarhu na ich dziejańni ŭ Departamient achovy, jaki vydaje licenzii šmatlikim słužbam biaśpieki. Taćciana zaŭvažaje, što dahladać niepaŭnaletnich biez prysutnaści ich baćkoŭ — nienarmalna:
«Ja nie liču narmalnym, što achoŭniki niekudy viaduć dzicia i tam jaho praviarajuć. Bieź milicyi, biez zakonnych pradstaŭnikoŭ».
U słužbie biaśpieki supiermarkieta «HIPPA» Jeŭraradyjo paviedamili, što kamientavać situacyju pakul nie hatovyja. Supracoŭnik administracyi, jaki nie pahadziŭsia nazvać svajo imia, ličyć, što historyja moža być vydumanaj i ŭ joj treba raźbiracca:
«Heta vam jany skazali. A što adbyłosia nasamreč, ja nie viedaju, mnie treba razabracca. Isnuje zakon ab achoŭnaj dziejnaści, tam prapisanyja našy paŭnamoctvy. U hetaj situacyi treba razabracca. Kazać i kamientavać niešta, nie razabraŭšysia, ja nie budu».
Adnak supracoŭnik słužby biaśpieki sietki supiermarkietaŭ «HIPPA» pryznaje — dahladać dziaciej biez prysutnaści ich baćkoŭ nielha. Toje samaje kažuć i «Praviły praviadzieńnia asabistaha nadhladu…», pryniatyja Savietam ministraŭ u 2010 hodzie. Tam paznačana, što «dahlad nie pravodzicca ŭ dačynieńni da niepaŭnaletniaj abo niedziejazdolnaj fizičnaj asoby, kali adsutničajuć jaho zakonnyja pradstaŭniki (baćki, usynavicieli, apiekuny, papiačycieli i inšyja asoby)».
Adkaz Departamienta achovy na skarhu Taćciana Hacura-Javorskaja pavinna atrymać na praciahu dvuch tydniaŭ. Jeŭraradyjo ŭ Departamiencie paćvierdzili, što raźbiarucca ŭ situacyi, jaho supracoŭniki ŭžo pačali pravierku słužby biaśpieki zhadanaha supiermarkieta.
