Siamiejny inkluzija-teatr «i» zaviaršyŭ padrychtoŭku premjernaha śpiektakla, u jakim razam z prafiesijnymi akciorami hrajuć dzieci z aŭtyzmam. Muzyčny detektyŭ na biełaruskaj movie «Flejta-čaradziejka» hledačy zmohuć pabačyć 3 červienia ŭ vialikaj zale Biełdziaržfiłarmonii. Arhanizatarami teatra vystupili MDHA «Dzieci. Aŭtyzm. Baćki» i kampanija velcom.
«Ideja stvaryć inkluziŭny teatr źjaviłasia kala dvuch hadoŭ tamu», — raspaviała dyrektar MDHA «Dzieci. Aŭtyzm. Baćki» Taćciana Jakaŭleva. — Ale tady hramadstva da jaje było nie hatovaje. Siońnia ŭsio atrymałasia — sumiesnymi namahańniami nieabyjakavych ludziej i arhanizacyj my stvaryli płatformu, jakaja daść mahčymaść nie tolki realizavać tvorčy patencyjał dziaciej z aŭtyzmam, ale i źmianić staŭleńnie biełarusaŭ da prablemy aŭtyzmu. Za miažoj da takich ludziej staviacca, jak i da lubych inšych, im usiudy adčynienyja dźviery. Toje ž samaje rana ci pozna budzie i ŭ Biełarusi».
«Pieršaja pjesa Siamiejnaha inkluzija-teatra «i» pastaŭlenaja ŭ karotkija terminy, — adznačyŭ načalnik adździeła karparatyŭnych kamunikacyj velcom Viačasłaŭ Śmirnoŭ. — Tvorčaja hrupa imknułasia paśpieć prezientavać śpiektakl da Mižnarodnaha dnia abarony dziaciej. Heta daloka nie pieršy prajekt velcom, nakiravany na farmiravańnie ŭ Biełarusi inkluziŭnaha hramadstva. Naprykład, velcom upieršyniu ŭ krainie arhanizavaŭ akcyju «Light It Up Blue» z uklučeńniem siniaj padśvietki na fasadach viadomych abjektaŭ stalicy. Akramia taho, pry našaj padtrymcy MDHA «Dzieci. Aŭtyzm. Baćki» raspracavała «Kamunikatar DAR» — mabilnuju prahramu, jakaja spraščaje razmovu ludziej z aŭtyzmam».
Prajekt možna całkam ličyć mižnarodnym: jamu dapamahajuć biełaruskija i zamiežnyja artysty, dramaturhi, madeljery i muzykanty. Teatr bačyć svajoj misijaj raspaŭsiudžvać na nacyjanalnym uzroŭni ideju hramadstva roŭnych mahčymaściaŭ. Arhanizatary prajekta ŭ pieršuju čarhu chočuć źviarnuć uvahu na prablemu dziciačaha aŭtyzmu.
Pieršy śpiektakl novaha teatra budzie ŭ žanry miuzikła. Pjesa poŭnaja detektyŭnych zahadak i alehoryj, a tamu pavinna być cikavaja jak dzieciam, tak i darosłym. U asnovie siužetu — pryhody dvuch dziaciej, jakija pryjechali da dziadźki ŭ viosku i apynulisia ŭ kazačnym suśviecie. Kab vyratavać les i adnavić naturalny cykł pryrody, piersanažy adpraŭlajucca na pošuki čaroŭnaj flejty. Pakolki realny i vydumany śviety ciesna pieraplecienyja, padarožžy dziaciej pryvodziać da niečakanych nastupstvaŭ.
Mastacki kiraŭnik teatra Iryna Puškarova raspaviała «NN» pra miuzikł i asablivaści pracy ź dziećmi.
— Jakaja ideja ŭkładzienaja ŭ hety miuzikł?
— Pakazać pieršy śpiektakl, dzie dzieci z aŭtyzmam naroŭni ź inšymi dziećmi pakažuć niešta niejmaviernaje. My chočam pakazać ludziam, kab jany nie bajalisia i zrazumieli, što z aŭtyzmam možna žyć, pracavać, i heta absalutna nie strašna. Na scenie nichto nie zmoža adroźnić, dzie dzicia z asablivaściami raźvićcia. Pakolki heta miuzikł, to na scenie budzie hučać mnostva žanraŭ — ad kłasiki da pop-muzyki. Ale samaje hałoŭnaje – pakazać našym dzietkam biełaruskuju kulturu, tamu ŭvieś miuzikł budzie na rodnaj biełaruskaj movie.
— Jakija asablivaści pracy ź dziećmi byli padčas padrychtoŭki da miuzikła?
— Dzieci z aŭtyzmam prachodziać takija ž etapy i ciažkaści, jak i astatnija. Usie jany nie pryvučanyja da biełaruskaj movy, z-za małoj jaje kolkaści ŭ ich žyćci. Šmat chto ź ich nie chodzić u škołu, ale z zadavalnieńniem udzielničaje tut, im heta padabajecca. Asabliva bačna heta mienavita na scenie – jany adno adnaho padtrymlivajuć. U astatnim usio vielmi dobra, bo pobač z nami zaŭsiody znachodziacca psichołahi.
Jość inšaja prablema. Naša zadača — dać im budučyniu, tamu što pakul jaje ŭ ich niama. Šmat chto ź ich nie moža pajści ŭ dziciačy sadok, škołu. A kali nie skončać škołu – niama profilnaj adukacyi, niama nastupnaj stupieni i prafiesii. Teatr u hetym sensie šmatfunkcyjanalny, bo dzieci zmohuć tut raści, raźvivacca, pry žadańni — zastacca tut i mieć prafiesiju.
Pastanoŭščykam śpiektakla vystupiŭ viadomy režysior Ihar Sidorčyk. Asnoŭnuju scenahrafiju i dekaracyi stvaraje Vienijamin Maršak, a ŭ raspracoŭcy kaściumaŭ udzielničaje kuciurje Janž Niadviecki, upryhožvańniami jakoha karystajucca Džoni Dep i Patrysija Kaas. Pradziusaram vystupiŭ zasnavalnik Alternatyŭnaha teatra Leanid Dynierštejn, a mastackim kiraŭnikom — artystka baleta i režysior Iryna Puškarova. Pieśni dla śpiektakla sačyniła Volha Zaleskaja, a kampazitaram i aŭtaram libreta stała Maryja Dziemiankova.
Pieršaja pastanoŭka Siamiejnaha inkluzija-teatra «i» projdzie 3 červienia ŭ vialikaj zale Biełdziaržfiłarmonii. Košt kvitkoŭ na bolšaść miescaŭ składaje ad 50 da 100 tysiač rubloŭ.
