Rasijski prezident Uładzimir Pucin nie zmoža sustrecca z brytanskim śpievakom Ełtanam Džonam padčas jaho vizitu ŭ Rasiju 30 maja, skazaŭ pres-sakratar Pucina Dźmitryj Piaskoŭ.
«My ź im [Ełtanam Džonam] pierapisvalisia paru tydniaŭ tamu. Sapraŭdy, była damoŭlenaść, što, kali hrafiki dazvolać, takaja sustreča adbudziecca, prezident Pucin vykazaŭ hatoŭnaść heta zrabić. Ale, na žal, na hety raz nie atrymajecca. Hrafiki nie supadajuć, ale heta nie značyć, što takaja sustreča nie moža adbycca nastupnym razam», — skazaŭ Piaskoŭ.
U listapadzie letaś Ełtan Džon zajaviŭ, što chacieŭ by sustrecca z Uładzimiram Pucinym, kab abmierkavać ź im pravy ŁHBT u Rasii paśla pryniaćcia zakona ab «prapahandzie nietradycyjnych seksualnych adnosin».
Śledam adbyŭsia telefonny zvanok brytanskamu artystu. Čałaviek, jakoha ser Ełtan pryniaŭ za Pucina, zaprašaŭ jaho pryjechać u Maskvu. Davoli chutka, adnak, vyśvietliłasia, što artyst staŭ achviaraj rozyhryšu, a nasamreč jamu telefanavali Uładzimir Krasnoŭ i Alaksiej Stalaroŭ, viadomyja taksama jak «prankier Vavan» i «Leksus».
Tym nie mienš, u kancy vieraśnia Pucin sapraŭdy patelefanavaŭ seru Ełtanu Džonu i zaprasiŭ sustrecca pry pieršaj mahčymaści.
«Pucin skazaŭ, što viedaje, nakolki Ełtan Džon papularny vykanaŭca, i zapeŭniŭ, što kali ŭ budučyni ich hrafiki supaduć, jon budzie hatovy ź im sustrecca i abmierkavać usie pytańni, jakija cikaviać śpievaka», — skazaŭ tady Dźmitryj Piaskoŭ.
